Ramadan laiin Israeli-ten Palestinian mosque suasam

Ramadan laiin Israeli-ten
Palestinian mosque suasam
West Bank luahtu Israeli-te chuan Muslim thla thianghlim, Ramadan laiin mosque khawih chhiain an hal a, hei hi he lai hmuna Israeli-ten Palestinian-te laka tharum an thawhna tharlâm ber a ni.
Wafa news agency chuan Thawhtanni khan West Bank hmar lama Nablus bul, Sarra leh Tal khaw inkara Abu Bakar as-Siddiq Mosque bangah Israeli awmten chi inthliarna lam hawi ziak râng tih a tar lang.
Ni khata an tawngtai hun hmasa bera tel tuma kalten thil chhia leh mosque luhnaa thil halna khu lo awm leh a kawngka pannaa thil tihfar rân an hmu niin Associated Press-in a tar lang bawk.
“Kawngka ka han hawn chuan mi a barakhaih hle a ni,” tiin a bul maia cheng, Munir Ramdan-a chuan news agency hi a hrilh a. “Mei hal a ni a, a tukverh a chhia a, a kawngka a chhe bawk,” a ti.
Ramdan-a hian CCTV thlalak atang chuan mosque pan hian mi pahnih, tuialhthei ni ngeia hriat leh spray paint bur kengin an kal a, minute rei lo te hnuah an tlanchhe leh tih AP hnenah hian a sawi.
A titute hian spray paint hian Prophet Mohammed-a sawi chhiatna lam hawi an ziak a, ‘phuba’ tih leh ‘price tag’ tih thu mal, Israeli chengten Palestinian-te leh an thil an beih an sawina tawngkam an hman thin an ziak bawk.
Hetiang thil hi Israeli luahtute leh sipaiten Gaza Strip-a Palestinian-te a beih chiamna piah lamah West Bank-a mite laka tharum an thawhna thleng mek zela thleng a ni.
Israeli sipai leh police chuan he thil thleng hi tha lo an tih thu sawiin a titute pawh man tuma an beih nghal thu an sawi.
Hetih lai hian mihring dikna chanvo humhalhtute chuan Israeli thuneitute hian Palestinian-te laka beihna thlen tur hian West Bank-a an mi awmte chu phalna an pe niin an sawi ve thung.
UN-in a chhinchhiah dan chuan October, 2023-a Israel-in Gaza a rûn atang khan West Bank-ah hian Israeli sipai leh a luahtuten Palestinian 1,094 an that tawh.
Kar liam taa UN Human Rights Council-in report a tihchhuahah pawh Israel-in West Bank-a hma a lak dan hi Palestinian hnam nuai reh tumna niin a tar lang a. Israel hmalakna zingah hian ‘tum mumal tak neia dan lova Israeli venhim hna thawktuten tharum an hman’ leh ‘dan lova Palestinian-te in a nawr chhiat’ pawh a tel.
Palestinian Authority hnuaia religious affairs ministry chuan nikum khan Israeli luahtuten West Bank-a mosque 45 beih leh suasam an nei tih an sawi.