Ramdang mi hnena ID card
pe lo turin tan lak thar tum
India khua leh tuite hnena pek thin nihna tihchianna (identity card) hrang hrang chu ramdang mi, a bikin Myanmar leh Bangladesh atanga chhan hrang hrang avanga lo lutte hnena pek chhuah a nih lohnana hma lak dan tur sawiin Nilaini khan Lungleiah district bawrhsap Navneet Mann hoin an thukhawm.
Bawrhsap pisa-a officer-te bakah card/certificate hrang hrang – voter ID card, Aadhaar card, birth certificate, ration card adt. pe chhuaktu office aiawhte, Lunglei District VC/LC Association leh Sub-Hqrs YMA Lunglei aiawhte an tel.
Bawrhsap chuan ram dang atanga raltlan emaw dan ang emaw dan ang lo emawa lo lutten India khua leh tuite hnena pek thin ID card neih an tum thin a, chu chuan khua leh tuite chanvo leh hamthatna hmuh tur a tikiamin, a chhuhsak thin tih sawiin, hemi veng tur hian khua leh tui ni lote hnena ID card pek chhuah a nih lohnan fimkhur a tul tih a sawi.
Ramdangmi hnena ID card pek chhuah palh venna tura fimkhurna leh hma lak dan tur rawtna bakah harsatna awm thin sawi a ni a. Certificate leh ID card dilna atana finfiahna (proof) leh hriatpuina pek chhuahnaah, certificate/ID card lem hmang an awm pawha hmu chhuak thuai thei turin endikna kawngah fimkhur leh tan lak lehzual nise, an ti. Ram dangmiten lirthei, ram, in leh bungraw dang an lei theihnana khua leh tuite zinga mahni hming leh nihna hawhtir a awm lohnan mipui pawh fimkhur a tul tih sawi niin, hemi kawngah hian khua leh tui zawng zawngte tanho a tul thu sawi a ni.
Lunglei district-a raltlan awmte fel taka chhinchhiah a ni tih sawi a ni a. Bawrhsap pisa atangin temporary ID siamsak thin an ni. Chhinchhiah danin, April 2025 kal mek thlengin an district-ah Myanmar mi raltlan 1971 leh Bangladesh mi raltlan 63 an awm mek.
Ramdang mi hnena ID card pe lo turin tan lak thar tum
Get real time updates directly on you device, subscribe now.
Prev Post