Kum hmasa aiin lum rih

Khaw lum hun a ni tawh a, a lum reng bawk a, nikum leh kum hmasa aiin khua hi a lum rih.
Khawchin leh sik leh sa chhinchhiahna hmun State Meteorological Centre-a an chhinchhiah danin, kumin March ni 29-ah khan a lum ber laiin 31°C a ni a, ni 30-ah khan a lum ber laiin 31°C a ni leh. April ni 1-ah 30°C, ni 2-ah 31°C a kawk leh bawk.
An chhinchhiahna enin, 2022 atanga 2024 thleng khan March thlaah 30°C aia lum a awm ngai lo; 2024-ah khan a lum ber laiin March ni 27-ah 28°C a ni a, 2023-ah a lum ber laiin March ni 13-ah 29°C, 2022-ah a lum ber laiin March ni 21 leh 22-ah 30°C a kawk. Tun hnai kum li chhungin March thlaah 2025-ah chauh 30°C a pel.
State Meteorological Centre lam chuan ruah sur loh vang a nih ber thu an sawi a, kuminah March ni 18-ah chauh ruah tui a la tla, chu pawh mm 1.8 chauh. Ruah tui mm 1.8 hi tih tham a ni lo a, teh tham ngawr ngawr chauh a ni. Nikum December ni 22-ah khan ruah a sur a, chumi hnu chuan a sur ta lo char char, March ni 18-ah tlem a tla chauh.
A thlirlawkna lamah ruah a hnai rih lo a, kar leh Thawhtanni leh Thawhlehni-ah Mizoram hmun thenkhatah ruah a sur mai thei tih a ni chauh.
State Meteorological Centre enkawltute chuan hmun thenkhatah a sur mai thei tih a nih hian a sur tak tak lo fo tih an sawi a, Mizoram lum ber lai chu April leh May a nih thu sawiin, ruah a sur loh zel chuan April leh May-ah khua a lum viau ang tih a hlauhawm thu an sawi. Ruah sur har leh a tlem hian loneitute a nghawng ang tih a hlauhawm thu an sawi bawk.