Ramdev lakah Court a lawm awlsam lo

Supreme Court thupek zah lo tia thubuai ngaihtuah mek Baba Ramdev leh a thawhpui Acharya Balkrishna te chuan Thawhlehni khan court room chhungah Supreme Court-in an herbal atanga damdawi siam Patanjali Ayurved te chu advertise lo tura a tichunga an tihluih avangin ngaihdam an dil a. Mahse, court chu a lawm mai hauh lo.
Bench of Justices Hima Kohli leh Ahsanuddin Amanullah te chuan selft-style yoga guru leh a thawhpui chu ngaihdam dilin an inchhir takzet tih finfiah nan kar khat hun a pe.
Ramdev tana ding senior advocate Mukul Rohatgi chuan a clients te chuan hma an la ang a, dan leh mipui mitah pawh tling thei zan turin hma an la ang tiin a sawi a. Court chuan April 23 a ngaihtuah leh turin a ti ta a ni.
Hearing neih tanah bench chuan Ramdev leh Balkrishna te chu courtroom hmaah ko vin Justice Kohli chuan Ramdev chu yoga lama a hnathawh an hriatpui thu a sawi a.
Mahse Bench chuan eng vanga Union government in Drugs and Magic Remedies Act hnuaia amah chhuichian tura a tih mek laia a herbal medicine te chu advertise lui zel nge a nih a zawt a.
Court chuan Patanjali in advertisment a tiha engkim tana damna damdawi zunthlum atanga thau uchuak leh thin tha lote mai bakah COVID-19 te thlenga pandemic len laia inzawrh luih chu ‘tihluih leh hre reng chunga Drugs and Magic Remedies (Objectionable Advertisements) Act of 1954 leh a rules te bawhchhiatna a ni’ a ti.
Chu mai bakah court chuan Supreme Court ngeiin dan bawhchhiaa an damdawi chu engkim tana damna tia an inzawrh chu ti lo tura a tih tuk lawkah press conference a neih zui nghal kher chhan a zawt bawk a.
Justice Kohli chuan Ramdev chu medicine dang allopathy te hnualsuat zawnga chetlak a dik lo va, an company medicine chu allopathy te aia tha fe tih te chu a dik lo a ni a ti a. Mi tam tak ngaisanga zuitu neih laia chutiang tawngkam hman chu mawphurhna laklohthlak a ti bawk.
Ramdev chuan a thusawiah a lo kal na lutuk nia a hriat thu a sawi a. Supreme Court hnenah kutsuihin ngaihdam a dil a, hun lo la kal zel turah chuan ka fimkhur tawh ang, a ti bawk.
Balkrishna pawhin a thiamloh a hriatfiah tawh thu sawiin thil an hriat tawk loh vang a ni tiin a sawi bawk.
Justice Amanullah chuan ‘dan chuan mitin angkhatin a en’ tia sawiin court a judge te chuan Constitution kan zui mai a, chu chu chhia chham hnanin kan kengkawh a ni. A lehlamah tu nge awmah kan buai lo va, court zahawmna chu kan chhawm nung mai tur a ni, a ti bawk.
Hearing neih hmasak April 10 khan Supreme Court chuan Ramdev, Patanjali Ayurved leh an Managing Director Acharya Balkrishna tena ngaihdam an dil tum hnihna chu a lo pawmsak duh tawh lo a ni.
Court chuan Patajali te ang Fast Moving Consumer Goods’ (FMCG) company tena mipui nawlpui hriselna derthawnga an siam laia sorkar in dang tura hmalakna a nei mai lo chu a sawisel bawk a.
“A tuartu chu mipui zel an ni. Heng FMCG company te an consumer te leh clients te an thil siam te an thatpui lutuk tur tia an chhiatna tur lama hruaitute hi kan ngaihven a ngai takzet” tiin Justice Hima Kohli chuan a sawi.
Baba Ramdev tena an damdawi engkim tana tha tia an vawrh lar vak chungchanga hearing neih hmasakah court chuan sorkar a sawiselna hle bawk.