Ramhmul damdawi nasa zawka zirchian tum

Ramhmul damdawi nasa zawka zirchian tum
State Medicinal Plants Board (SMPB) Mizoram Executive Body chu an chairman, Health & Family Welfare minister Lalrinpuii kaihhruaiin Thawhtanni khan an thukhawm a. Ramhmul damdawi chungchanga hmalakna thlirhoin, hma lak chhunzawmna tur sawiho a ni.
SMPB Mizoram leh Mizoram University research scholar ho tangkawpin Mizorama district 6-a ramhmul damdawi zirchian leh chhinchiah (documented) tawh chu lehkhabua chhuah turin Executive Body hian a rel a. Ramhmul damdawi chungchanga zirchianna (research & development) pawh nasa lehzuala kalpui an rel. Ram tana rotling “Herbal Garden of State Importance” project tihlawhtling tura hma lak chhunzawm an rel bawk.
State Medicinal Plants Board hi sawrkar laipui Ministry of AYUSH-a National Medicinal Plants Board-in state tina ramhmul damdawi ti changtlung tura ruahmanna a siam angin 2001 October 1 khan Mizoramah din a ni a. Kum 2015 atang khan AYUSH department hnuaia sengluh a ni.
SMPB Mizoram hian ramhmul damdawi chinpun, humhalh, a chungchang inhrilhhriat leh kawng hrang hranga tichangtlung turin hma a la thin a ni.