Ramin mipui tana ding ngam a mamawh – MPCC treasurer

Ramin mi dik, mi rinawm leh thil tha ti tura anmahni thlangtu mipui tana ding nghet ngam a mamawh tih Congress treasurer Dr Lalmalsawma Nghaka chuan a sawi.
Zirtawpnia Congress Bhavan-a political session neihah Dr Lalmalsawma chuan, Congress party chu Kristian pachal din a nih angin Congress-ah chuan Pathian hi no.1 a nih zel a ngai a. Hmasawnna leh development duh a, awh vang ngawtin ringlo mite tawktarh apiang an pawm ve zel a rem lo tih a sawi. “Ramin a mamawh chu mi hausa leh milar te an ni kher loa, zirna lama sang tak an ni hran lo. Mi dik, mi rinawm leh thil tha ti tura anmahni thlangtu mipui tana ding nghet ngamte hi a ni ramin a mamawh chu ni,” a ti. Sawrkar hrim hrim leh lal hrim hrim tuma tuihalna chuan ngaihtuahna dik lo leh rah tha lo a nei thuai thin, tiin, thawhrimna, dikna, huaisenna leh thuhnuairawlh takin mahni leh kan hnam zahawmna tur rim taka thawh chu Pathian min zirtir dan a ni tih a sawi.
Congress president Lalsawta pawhin thu sawiin, Chakma District Council inthlanah sum chakna an buan hneh loa, sawrkarna an siam zo rih lo a. Candidate pakhat boral avanga inthlan buatsaih that lehna bialah an chak ve thung tih a sawi. Mipui nena tangtlangin Mizoram hmun dangah chuan sum chakna hi an hneh theih tawh ngei a beisei tih sawiin, “Inthlana sum chakna hi Mizoram mipui, kohhran mipui nen tangtlangin kan do dawn a. Inthlana candidate-ten an senso, mipui sum hmanga rulh leh an tum thin hi tihtawp kan tum dawn. Sawrkar tha din tumin, mirethei zawkte tan Tang Puihna kan buatsaih a ni,” a ti.