Ramngaw tichhe lo zawnga eizawnna kalpui dan duang

Global Environment Facility kaltlanga Green-Ag cum Green Landscape Information Platform (GLIP) hnuaia hmalakna chu Nilaini khan Agriculture minister PC Vanlalruata hoin en a ni a. Lunglei leh Mamit district khaw 38-a hnathawhna tur hmanrua sem nghal a ni.
Agriculture minister chuan Green-Ag kaltlanga Mizorama ramngaw humhalh chunga kuthnathawktute tan eizawnna ngelnghet siam tura hma lak a ni chu lawmawm a tih thu a sawi a. Green-Ag kalpuina state hrang hrang zingah hmahruaitu nih tum zel turin thawktute a chah. Green-Ag cum GLIP chu ei leh bara kan intodelhna kawnga hmanraw pawimawh a nih a beisei thu a sawi bawk.
Report-a tarlan danin, Green-Ag hi Sustainable Development Goals leh Food & Agriculture Organisation thil tum thenkhat tihlawhtling tura hmalakna a ni a. Mizoramah Lunglei leh Mamit districtkhaw 38-ah kalpui mek niin, kum 2027 thleng awh tura ruahman a ni. Kuthnathawktuten ramngaw tichereu lo zawnga eizawnna ngelnghet an neih theih nan ruahmanna siam niin, Farmer Field School kaltlangin loneitute leh ran vulhtute hnenah zirtirnate pek thin a ni. Village Implementation Committee dinin khaw hrang hrangin an mamawh mil zela ruahmanna duangin, hma lak thin a ni.