Ramri-ah Bangladesh chet dan duh lohna lantir

Ramri-ah Bangladesh chet dan duh lohna lantir
Tripura-a BJP-in sorkar siam nana an thawhpui mek, Tipra Motha party thalai pawl, Youth Tipra Federation (YTF) chuan Thawhtanni khan an state chhim lam, Bangladesh nena an inrina bula Bankar Market-ah lian takuin tun hnaia thenawm ramin Muhari lui hrula hmun an sak duh lohna an lantir.
Bangladesh hian ramri-ah hian lui kamah hmun thar an din a, tual chhung mite chuan Indian lamah tui lian, a bikin fur laiin a hlauhawm zual phah thei niin an sawi.
Duh lohna lantirtute hian Indian flag leh an party banner an keng a, lui kam pan an tum a; mahse, Border Security Force sipaite leh venhim hna thawktu dangten ramri bul mai a nih avangin thil tha lo lian zawk a thlen theih avangin an dang.
YTF member-te hian Bangladesh duh lohna an aupui a, sorkar lailawk ding meka chief advisor Mohammad Yunus-a lem an suasam a. Ani hi tun hnai lawka China-a a kal tuma India hmarchhak chu tuipuiin a pawh loh, tuipui an kal dawn chuan Bangladesh kaltlang ngai anga sawitu leh China atanga investment ti tam tura sawmtu a ni.
Venhim hna thawktute leh YTF hruaitute an inbe zui a. Hemi hnu hian state president Suraj Debbarma leh TTAADC South Zone chairman David Murasingh telin mi eng emaw zatin ramri hi an thleng a, lui kama thil dinte thlithlaiin lungawi lohna an lantir bawk.
A hnuah YTF President Debbarma chuan Bangladeshi sorkar chu India ram hnaih taka hmun an sak avangin khawvela ram inri dan kalhmang palzutah a puh.
“India khua leh tui kan nih angin kan ram leh kan rami venhim hi kan tih tur a ni,” a ti.
Sorkar pawh Bangladesh chet danah hian engvanga engmah ti lo nge a nih tih a zawt a, Tipra Motha-in ‘Maharaja pasaltha’ (an party dintu, Pradyot Kishore Debbarma) a neih chuan hetiang ram inneihsak ang hi chu a ngaihzam dawn loh thu a sawi bawk.
Debbarma chuan Bangladesh hian tuna an tih anga India ram chu inches khat pawh a la leh a nih chuan Tipra Motha-in ‘Greater Tipraland’ din an duhna, tun hmaa ram then a nih hmaa Tripura-a lalram ni thin, Chittagong Hill Tracts leh Cox’s Bazar pawh huap chu an kalpui nasat lehzual tur thu a sawi bawk.
Bangladesh-in chet a lakna bul lawka India khua, Belonia-a chengte chuan thenawm ram chetna chu ngaihven se an duh thu leh thuneituten lui kam humhalha ruahtui a tlak hun pawha tui lian laka an himna tur ngaihtuahsak se an duh thu an sawi.