Ningani hian ZORO Gen. Hqrs bultumin Zokhawthar, Vaphai, Lunglei leh Tengnopal district Manipur-ah India sawkarin Indo-Burma border hung a tum leh Free Movement Regime (FMR) hlih a tum duh loh lantirnan peaceful rally neih a ni. Vaphaiah hian village council kaihhruaiin zingah hman a ni a. ZORO Gen. Hqrs vice president Rohmingthanga Kawlni leh YMA aiawh, VC aiawh leh MUP aiawhten thu an sawi. Hun hmannaah hian Vaphai leh khaw thenawm atangin mipui thahnem tak an tel a ni.
Manipur Tengnopal district-ah ZORO Gen. Hqrs buatsaihin hman a ni a. Kuki Inpi leh Kuki Students’ Organisation-in an buaipui a ni. Ramri hung duhlo tu leh FMR hlih duh lo mipui thahnem tak an pungkhawm a. Duhlohna placard kengin kawng an zawh.
Lunglei ZORO Division Hqrs pawhin ramri hung duh lohna leh FMR hluh duh lohna lantirin an pungkhawm bawk.
Zokhawthara hmannaah Zokhawthar leh a chhehvel khaw mipui thahnem tak an pungkhawm a. Burma lam Khawmawi khua leh a chhehvel mipui thahnem takin an tawiawm a ni.
ZORO president R Sangkawia chuan, ramri hung leh FMR hlih duh loh lantirna an buatsaih hi pawl mal hmalakna a ni loa, hnam thil tak tak a ni a, Zofa zawng zawng hmalakna a ni, tiin a sawi.
UN Declaration on the rights of Indigenous Peoples 2007 Article-ah “Tualto hnam, a bikin khawvel sawrkar ramri khamin a thendarhte chu an inkalpawhin an intanpui anga, sakhaw thil leh khawtlang thil, ei leh bar leh politics-ah anmahni mi leh sate nen inpawh a, sawiho theihna dikna chanvo an nei a ni. Ram roreltute chuan tualto hnamte nen inbe rawnin he dikna chanvo hi tipuitling turin hma an la ang,” tih a chuan thu ZORO president hian a sawi a. He dan pass a nih lai hian India chuan a duh lamah vote a pe a, tunah erawh a kalh zawnga hma lak a tum chu ZORO chuan a hrethiam lo tih a sawi.
ZORO general secretary L Ramdinliana Renthlei chuan Zofate thendarh kan nih tirha kan rilrua cham reng chu insuihkhawm leh a, rorelna pakhat hnuaia awm a ni, tiin, “Kan beisei kan nghah mek laiin India sawrkar chuan ramri hung a tum a, zalen taka kan inkalpawhna hlih a tum. Ramri a hung lui a, FMR a hlip lui a nih chuan Zofate independence min puan sakah kan ngai dawn a, kan thiam angin kan chhanglet ve ang,” a ti.
Zokhawhthar peaceful rally-ah hian MLA pahnih – Clement Lalhmingthanga leh Lalmuanpuia Punte, Sub-Hqrs YMA Champhai, Zokhawthar khawtlang hruaitu aiawh, Hualngo Peoles Organisation aiawh leh political party aiawhten thu an sawi bawk.
Ramri hung leh FMR hlih tum duhlohna lantirin pungkhawm
Get real time updates directly on you device, subscribe now.
Prev Post
Next Post