Ramri kaihhnawihah inbia

Kolasib district, Cachar district leh Hailakandi district thuneitute chu inbiak hmuh theihna hmangin ramri chungchang leh thildang sawiin an inkawm.
Kolasib district atangin bawrhsap John LT Sanga leh SP David H Lalthangliana hoin official dangte an tel a. Assam lam district pahnih thuneitute pawh bawrhsap leh SP hoin an tel.
Inkawmnaah hian ramri chungchang thil pawimawh an sawi ho a, ramri hnaih district amite inpawh lehzual theih nan Whatsapp group siam nise, he group-ah hian anmahni bialtu bawrhsap, SP leh DIG te telh nise, an ti. Hei bakah border district-a police station hrang hrangah officer -in- charge /in-charge outpost ho phone number inpek tawn nise, zu, ruihhlo leh dan loa bungraw tawlh chi reng reng manchhuak turin thawhhona a that leh zual nan information inpek tawn nise, pawikhawihtute man an nih theih nan thawhhona tha zawk neih tlan nise, tihte an rel a ni.