Ramri kaihhnawihah state pahnih aiawhte inbe dawn

Mizoram leh Assam sawrkar aiawhte chuan vawiin – August 9 hian Aizawlah ramri chungchanga inhriatthiam lohna awm thin chinfel tumin an inbe leh dawn.Mizoram leh Assam hian ramri chin an hauh danah inhriatthiam lohna neiin silai hial a lo puak tawh a. Hemi hnu hian dawhkan atanga chinfel tumin vawi engemawzat an inbe tawh a ni. Tuna Mizoram sawrkar mek, ZPM kaihhruai sawrkarah erawh an inbiak tum khatna tur niin, Mizoram lam hi Home minister K Sapdanga’n a ho dawn a; Assam lam hi inbiakna hmasa lama rawn ho tawh thin tu tho Border Protection and Development minister Atul Bora chuan a rawn ho leh dawn nia thu dawn a ni.
Ruahman lawk ang chuan State Guest House Chaltlangah tlai dar 4.00 ah an inbia anga, tlai dar 6.00 ah chuan an inbiakna rah chhuah sawi turin thuthar thehdarhtutue kawm hman an tum a ni.
Home minister K Sapdanga chuan Assam sawrkar nena ramri chungchanga an inbiak lehna tur hian rah tha engemaw tala a chhuah ngei a beisei tih amah kawmtu thuthar thehdarhtu a lo hrilh tawh a. “Eng anga thuiin nge hmasawnna a thlen ang tih kan hre loa, hmasawnna erawh a awm ngei kan beisei. Memorandum an rawn neih a rinawm a, keini pawhin memorandum kan lo nei dawn. Sawrkar kalta thuken pawh ken chhunzawm zel chin a awm ang,” a ti.
Ramri chungchanga Mizoram sawrkar dinna chu, sawrkar tawhte dinna – Bengal Eastern Frontier Regulation (BEFR) 1875 thokha a ni dawn tih a sawi a. Ramria chengten buaina an tawh tawh lohna’n tharum zawng ni loin, dawhkana chinfel tumin theihtawp an chhuah zel dawn tih a sawi bawk.
Home minister sawi danin, inbiakna bawhzuia Mizoram sawrkarin Assam sawrkar enkawl zinga khaw 62 chu Mizoram chhung a nih thu Assam sawrkar hnenah hian an thlen tawh a ni.