Ramria insumdawn tawnna tur tlawh
Champhai district chhung Indo-Myanmar ramri depa awm, insumdawn tawnna kawnga khaw pawimawh Zokhawthar chu Ningani khan Commerce & Industries minister Dr R Lalthangliana chuan a tlawh a. Ramri kaltlanga insumdawn tawnna chak zawka kalpui a nih theihna tura hma lak dan leh hmachhawp bawhzui dan tur a enfiah.
Ramri insumdawntawnna kawngah mipui eizawnna tibuai lo leh khaihlak lo tura hma lak chu sawrkar duhdan a ni tih minister hian sawiin, danin a phalte hmanga sumdawnna kalpui chu mipui zawm tur leh mawhphurhna a ni tih a sawi. International border trade tihchangtlun na’n cheng nuai 1500-in Zokhawthar Land Custom Station tihchangtlun mek a nih bakah India rama international border trade liantham zawk kalpuina tur hmun 25 thlanchhuah zingah Zokhawthar leh Zorinpui thlan tel an ni tih a sawi a ni.
Hriselna kawnga hmalakna zingah, Zokhawthar Health Sub-Centre pawh B.Sc Nursing thutchilh, Health & Wellness Centre-ah hlankai a nih thu leh hmunhma pawh sakthat mek a ni tih a sawi a. Thawktu leh hmanraw pawimawh nen thuamthat zel tum a ni, tiin, Zokhawthara zirna kawnga mamawhna thlente chu a tul anga enzui a tum thu a sawi bawk.
Commerce & Industries minister hian SASCI sum nuai 1500 senga Land Custom Station upgradation kalpui mek hnuaia sak staffs quarters, officers quarters, Animal Quarantine Centre, Plant Quarantine Centre, Food Testing Laboratory, Immigration Check Post-te tlawhin hmalakna a enfiah a. Contractor-te chu hna tlo leh tha zawk, hun bituk chhunga zo hman turin a chah.
Ramria insumdawn tawnna tur tlawh
Get real time updates directly on you device, subscribe now.
Prev Post
Next Post