Ramsanga kutah badminton international bronze medal dang pahnih lut leh!

Ramsanga kutah badminton international bronze medal dang pahnih lut leh!
August ni 27, 2024 atanga September ni 1, 2024 chhunga Pune-a buatsaih Yonex-Sunrise India Junior International Grand Prix 2024-ah Durtlang rawlthar C. Lalramsanga s/o C. Lungmuanpuia chuan a telna category pahnihah bronze medal pahnih a hlawhchhuak.
Ramsanga hian a kawppui Pragati Parida nen a hma chiah chawlhkarah khan Kotak India Junior International Series 2024 mixed doubles category-ah bronze medal dawngin, Mizo badminton player zinga international medal hlawhchhuak hmasaber nihna a lo chang tawh a, a aia tournament lian leh ngaihhlut hlawh zawkah international bronze medal pahnih dang a vawchhuak leh ngat a ni.
Pune lama khelh Yonex-Sunrise India Junior International Grand Prix 2024 mixed doubles inelna huangah hian first round-ah Ramsanga leh a kawppui chuan Chinese Taipei lam mi Cheng Han Tsai leh Chiao En Yu tangdun lakah 21-18, 21-13 hnehna changin, second round-ah Saurav Sahu leh Zenith Abbigail (IND) inkawp chu 21-11, 21-18-in an hneh leh.
Quarter-final match-ah kar hmasa lama thil thleng bawk a thleng nawn leh a, international tournament lianah Mizo an intum nawn. Lalrempuii leh a kawppui Arsh Mohammad-te tangdun chu Ramsangate thiandun hian an hneh nawn leh a, deciding-ah 11-21, 21-19, 23-21-in an chak.
Last four-ah Indonesian pair Mohammad Vito Annafsa leh Keyla Annisa Putri inkawp an hmachhawn a, deciding game-ah, 21-17, 15-21, 21-15-in a vanduai zawkah an tang ta a ni.
Yonex-Sunrise India Junior International Grand Prix 2024-a Durtlang rawlthar international bonze medal pahnihna hi under-19 men’s doubles category-a Param Choudhary nena an lak a ni thung.
Ramsangate thiandun hian first round-ah India pair tho Mridul Jha leh Angad Muchal-te inkawp chu 21-14, 17-21, 21-16-in an hneh phawt a; second round-ah Chinese Taipei pair Huang Hong-Yu leh Yan Bin Huang tangdun chu 21-16, 19-21, 21-18-in an hneh leh.
Quarter-final match-ah pawh harsatna lian tawk loin Chris Anjen Baptist leh Rehaan Phutela (IND)-te tangdun lakah 21-15, 21-12 hnehna an sualchhuak leh a ni.
Semi-final inkhel hmuhnawm takah India pair tho Bhavya Chhabra leh Arsh Mohammad (seeded no 2)-te inkawp nen an intum a, 22-20, 21-19-in Ramsangate thiandun chu a vanduai zawkah an tang leh.
He tournament-ah hian Mizo pali an chhuak a, Lalrempuii chu mixed doubles bakah under-19 women’s doubles category-ah a inlan a, 2nd round-ah an tla.
H. Lalthazuala (U-19 men’s singles) leh Lalrinkimi (U-19 women’s singles)-te pawh first round-ah vanduai zawkah an tang ve ve a ni.
Tunhnai international tournament pahnih atanga bronze medal pathum tehreng hlapchhuak thei Mizo rawlthar C. Lalramsanga hlawhtlinna hi Mizoram badminton chanchina hriatreng hlawh tawh tur zinga mi a ni ngei ang.
TATA Trusts, NEIDA, Mizo-ram State Sports Council leh Mizoram Badminton Association (MBA)-te thawhhona kaltlangin Ramsanga hian a badminton zinkawng a tan a; Pullela Gopichand Badminton Academy-ah hun engemawchen awmin, tunah erawh Badminton Association of India-in a din National Centre of Excellence, Guwahati-ah a inzir mek a ni.
Mizoram leh India ram tihmingthatu C. Lalramsanga hi MBA chuan a chhuang takzet tih thuchhuah siamin an tarlang a, a medal lak avang lawmpuina hlan chungin training tha taka a chhunzawm theihna’n leh a kal lehzelna turah hlawhtlinna sang zawk a chan zel theihna’n MBA chuan duhsakna sang ber a hlan nghal.