Rapper Gucci Mane kidnap-a rawktu rapper Pooh Shiesty leh Big30 an man

Kumin January-a thil thleng kha a ni a, mahse, he in-kidnap leh inrawknaa a meizang hlaptute hi April ni 2 khan an man ta. US-a Department of Justice (DOJ) chuan Memphis rapper Pooh Shiesty leh Big30 te chu January thlaa Dallas music studio-a thil thlenga a bultumtu an nih thu an puang.
Prosecutor-te chuan he in-kidnap leh inrawknaa tel mi pakua te zinga pariat chu man an nih thu an puang a, an man zingah hian Pooh Shiesty (a hming tak Lontrell Williams. Jr.) leh a pa Lontrell Williams Sr., Memphis music scene vela ‘Mob Boss’ tia hriatlar te pawh an tel.
DOJ-in an tarlan dan chuan Pooh Shiesty hian a recording contract chungchangah Gucci Mane hi ‘business meeting’ neihpuiah a sawm a. Mahse, an inbe fuh ta vak lo a, chutah Pooh Shiesty hian AK-style pistol phawrhin, Gucci Mane chu silai a tin chungin, Gucci Mane nena recording contract an neih atanga chhuah zalenna a ziah luih tir ta a ni.
Hetianga an inbengberek buai lai hian Big30 (a hming tak Rodney Wright Jr.) chuan Gucci Mane leh midangte chu an tlan chhuah theih loh nan studio kawngkhar a lo veng a, an chekawi hote pawhin ralthuam phawrhin, studio chhunga awm te chu an rikrap a, an Rolex sana, tlereuh leh pawisa bakah thil hlu dangte pawh an laksak a ni.
Gucci Mane (a hming tak Radric Davis) hian 2020 khan chutihlaia newcomer Pooh Shiesty hi a record label 1017 Record hnuaiah a la lut a, Pooh Shiesty hla hit leh a rawn lar chhuah tak takna ‘Back in Blood’ (2021) te pawh an produce sak a ni.
Pooh Shiesty hi dan leh thupek kengkawhtute nen an inhnim hnai ngun viau mai a, 2021-a a rawn lar chhuah hnu lawkah ralthuam kawl thubuaia kum nga chhunga jail tang turin a chungthu rel a ni a, mahse, home detention a awm turin jail atangin an chhuah a, kumina January-a music studio-a thil thlen lai pawh hi house arrest-a a awm lai a ni nghe nghe.
Pooh Shiesty hian thiam loh a chang a, convict a nih chuan dam chhung lung in tang tura hrem theih a ni ang.