Rastriya Poshan Maah khar

Naupangte chaw tha pek kawnga sawrkar laipui hmalakna, Rastriya Poshan Maah (National Nutrition Month) 2024 hman chu Thawhtanni khan khar a ni.
Hmanpuitu Food Civil & Supplies minister B Lalchhanzova chuan kumtluana naupangte mamawh chaw tha pek chu an chunga hmangaihna kan lantir theihna leh thuk taka an thinlung kan hneh theihna a ni tih a sawi a. Anganwadi chu a bik taka naupang harsa zawk tana innghahna a ni, tiin, he scheme tihhlawhtlinnana hmalatu leh thawktute chu naupang thanlenna kawnga puitu ni zel turin a chah.
Naupang enkawl lamah department hrang hrang, a bikin Health, PHE, P&E leh Aayush chu he scheme tihhlawhtlin zelna atan thawhhona tha nei turin a ngen bawk.
Women and Child Development director Zoramthangi Chhangte chuan Mission Saksham Anganwadi & Poshan 2.0 a sawifiah a. Deputy director Sailopari sawi danin, Saksham AWC ni tur chuan Anganwadi Centre-ah RO water filter vuah a nih theih nan tui connection a awm tur a ni a; RO filter leh LED TV vuah a nih theih nan electric connection a awm tur a ni a; ECCE tha taka kalpui a nih theih nan naupangte infiamna tur classroom zau tawk tak a awm tur a ni. Chuktuah huan (nutri-garden) a awm tur a ni a; ruahtui khawl a nih theih nan tuizem lian hunna tur an nei tur a ni.
Women & Child Development-in kumtin an hman thin Rashtriya Poshan Maah hi tun tum a tum 7-na a ni.
ICDS (Integrated Child Development Scheme) hi Mizoramah kum 1979 atanga din tan niin, heng – chaw tha pek belh, hri danna pek, nuten an fate an enkawl thiam theih nana zirtirna pek, thiam bul tanna ECCE (Early Childhood Care and Education), khawtlang mipui nena thawhho leh mithiam zawkte hnena naupang dam lo refer-te chu an hnathawh ber a ni.