Ration card atanga paih nia inpuhna House-ah sawifel

Ramri bul, Mizoram lam Phuldungsei khuaa mi 85 ration card atanga paih an nih chungchang chu Ningani khan Assembly House-ah sawifel a ni. Danin a phalsak angin Hachhek bialtu MLA Robert Romawia Royte chuan Phuldungsei khaw mi 85, Mizorama ration card atanga paih an nih chungchang hi Assembly speaker hnenah sawi a dil a. Remtih sak niin, minute 5 hun pek a ni.
MLA hian RCMS (Ration Card Management System) Mizorama an Aadhar nena online-a thlunzawm tawh sa Phuldungsei khaw mi 85 hi Tripura-ah offline (manual) in ration card pek sa tho an ni a, Tripura hian a paih (delete) duh bik loa, offline-in an la kal reng tih chu official-a thu a dawn dan a ni tih a sawi.
Kum 2024 tir lam khan heng mi 85 hi Mizoram sawrkarin RCM system atang hian a paih nia sawiin, hei hi a hriat ve leh chief minister pawh a sawipui nghal tih Robert Romawia hian a sawi.
Ration card atanga inpaih chungchangah hian software thar an hmanah automatic-in a lo paih nia sawi chu a pawm lo tih sawiin, “RCMS hnuaiah hian ration card hi automatic-a inpaih ngawt theih a ni loa, mihringin delete a ngai,” a ti.
Inpuhmawh leh indem tur zawng tawh loin, eng tin nge Mizoram ration card-a dah luh leh theih an ni ang tih ngaihtuah tlan a ngai tih a sawi a. Offline-a ration hi la pek rih phawt a, online-a Aadhar card nena zawm leh theihnan sawrkarin hma zelin, chumi ti tur chuan tan lak ho a tul tih a sawi a ni.
Danin a phalsak angin a changtu minister-in hetianga House-a ‘notice’ pekah hian a duh zawng a sawi ve thei a. Hemi ang hian speaker phalna in FCS&CA minister B Lalchhanzova chuan thil awm dan a sawi a ni.
Tunhma lam khan ramria awmte zingah ration card nei kawp an awm a, nikum June chhoa mobile seeding tih lai khan Phuldungsei khaw mite hi Tripura ration card-ah awm tel tih hriatchhuah a ni a. An retailer kaltlangin Tripura atang hian inpaih turin an hrilh thin a, mahse an inpaih si loa, Mizoram lam RCM system-ah Tripura-a awm kawpte hi a in-update thei ta lo tih a sawi.
“Tripura hian Mizoram aiin ration card enthat/ Aadhar seeding hi an lo ti hnasa a. Phuldungsei khaw mi, Tripura lama awmte kha Tripura RCMS-ah dan thar anga khung fel an lo ni hmasa a, Mizoram-in kan tih ve khan Aadhar awm kawp ho kha Mizoram RCMS khan a hmu ve thei ta loa, delete ni loin system-in a hmu thei lo a ni,” a ti.
Tripura ration card atang hian paih leh theih an ni a. Ngen pawh an ngen thin tih minister hian sawiin, “An in-delete rual rualin Mizoram lam RCMS ah thun nghal theih an ni. Hetiang card double deletion hi India ram pumah one nation one ration card system-in a phut angin kalpui mek a ni,” a ti.
Tripura sawrkarin an delete duh lo tih chu, delete duh loh theih a ni loa, ration card-a awm leh awm loh chu mipui zalenna a ni tih sawiin, “Kan khua leh tuite hi kan ngaihsak a, ration card-ah a awm kawp theih tak loh hnu hian, Tripura atangin in delete mai se, Mizoram lama thun hi kan duh dan ber a ni,” a ti.
Phuldungseiah hian chhungkaw 21, member 85 chu AAY (card eng), thla khatah mi pakhat tan kg.35 a thlawnin October 2024 atang khan manual ration card siamin an quota pek mek zel an ni a, ration hi Tripura lama quota nen an la kawp thei tihna a ni tih a sawi a. An tan hian thla tin quintal 7.35 pek thin a ni tih a sawi.
National Food Security Rules 2015 Chapter 9 (6) in ration card hi indentity proof leh citizen proof-a hman loh tur a tih angin, state danga ration card neih vanga an original state khua leh tui an nihna an hloh loa, an ni pawh Mizoram mi an la ni reng tih a sawi bawk.