Ration card paihsakah ngaihdam dil loh chuan puan belh tur a awm – MNF Thalai

Phuldungsei khuaa Mizoram ration card paihsak takte chungah Mizoram sawrkarin a tihsualah ngaihdam dil loa chhuanlam a siam zel a nih chuan chiangkuang zawka la puan belh an tum tih MNF Thalai chuan an sawi.
MNF Thalai Hqrs huchhuak chuan, tunhnaia Mizoram sawrkarin Phuldungsei khuaa Mizoram ration card nei nghet mi 85 a paihsakte zirchiang leh khawtlang hruaitute kawmin an kal tih a sawi a. Phuldungsei khuaa mi 85 chu Mizorama Adhaar card thlunzawm ration card nei vek an ni a. Kumin April leh May thlaa an ration card hi an hriat miah loha paihsak an ni tih a sawi.
‘Kan hriat danin, Tripura sawrkar hian an state-a Adhaar nen an ration card thlunzawm hi an duh leh tum dan a ni a. Mizorama thlunzawm a nih avangin an ti thei loa, Mizoram sawrkarin a paih veleh Tripura sawrkar hian a lo thlunzawm vat a, a paihsaktu Mizoram sawrkar chuan a thlunzawm thar leh mai thei tawh lo nia hriat a ni,’ thuchhuah chuan a ti.
He harsatna hi a hriat veleh bialtu MLA, MNF Thalai president Robert Romawia Royte chuan chief minister Lalduhoma chu hmaichhana sawipuiin, lehkha pawh a pe a. Sawrkar laipuia Ration Cards Management System mithiamte a sawipui bawk tih sawiin, ‘Hemi chungchangah hian information kan neih belh zel a, Mizoram sawrkar hian a tihsualah ngaihdam dil loa chhuanlam a siam zel a nih chuan chiangkuang zawkin hnam pawi an khawih dan hi kan puangchhuak dawn a ni,’ a ti.
Phuldungsei khua mite chuan Mizoram sawrkar chu an innghahna leh an thlamuanpui thin a ni tih an lo hrilh thu MNF Thalai hruaitute chuan sawiin, tun tuma an hriat miah loha ration card paihsak an ni chu na an ti a. Tripura sawrkar chuan an ration card atangin a paih duh dawn loa, hun rei tak Mizoram ration card an hmang tawh tih an hriat pawhin an paih thei lo niin an hrilh tih an lo hrilh thu an sawi a ni.