Rawngin min nghawng dan

Rawngin min nghawng dan
Rawng (colour) hian kan nitin nunah nghawng a lo nei nasa hle niin an sawi a, mipat hmeichhiatna lam a ni emaw, kan mood a ni emaw, kan ei leh in bakah kan thluak hnathawh dan thlengin a nghawng niin an sawi. Khai le, Times Of India-a rawng chi hrang hrangin kan nun a nghawng dan an ziah te kan rawn tarlang ve e.
1. A pawl (blue): In tihcher i duh a, chaw ei tlem i tum a nih chuan in choka-ah kha rawng pawl han hnawih teh le. Zirchianna an neihah chuan room rawng pawl-a chaw ei thin te chuan room rawng sen emaw, a eng emaw, a hring emaw, a var emaw a chaw ei thinte aiin chawhrualin hmun thuma thena hmun khatin an ei tlem zawk, an tih tlat chu. ‘Color: The Secret Influence’ tih lehkhabu ziaktu Kenneth Fehrman chuan, “Kan ei turah pawh thil pawl lampang chuan min hip lo bik hle,” a ti.
2. A senno (pink): Rawng senno hian kan rilru lam a khawih niin an sawi. American Institute for Biosocial and Medical Research-a director Dr Alexander Schauss chuan 1970’s daih tawhah khan rawng senno hian thinrimna a bengdai tih a lo hmuchhuak daih tawh. Dr Schauss chuan, “Rawng senno awmna hmunah chuan mi an thinrim har bik a, room senno-ah chuan thinrim pawh tum ila a harsa bik tlat. A senno bulah chuan Kan lungphu a rang thei tlat lo,” a ti.
3. A sen (red): Hmeichhe kawr sen ha chuan mipa mit a la bik riau a, chutiang mipa kawr sen ha pawhin mipa mit a la riau niin University of Rochester, New York-a mithiam ten zirchianna an neih atangin an hmuchhuak niin an sawi. Mipa chi hrang hrang 100 te chu hmeichhe thlalak, thawmhnaw thuidan inang, mahse, rawng chi hrang hrang an ha lai an entir a, kawrsen an hakin mit te mit an la ber tih an hmuchhuak a, chutiangin mipa kawr sen ha te pawhin mipa an la riau.
4. A eng (yellow): Rawng eng hian kan rilru sawrbing theihna a tichak niin an sawi a, a chhan chu rawng eng chuan kan thluak leh nervous system a tih harh vang a ni. Rawng eng hian mintihlim theitu hormone, serotonin an tih chu kan thluakah a tichhuak niin an sawi.
5. A hring (green): Rawng hring chuan min tihahdam thei, hei vang hi a ni ngei ang TV studios-ah te pawh an mikhual te screen-a an lan hmaa chawlh hahdamna tur leh an nervous lutuk loh nan ‘green room’ te an neih thin hi. Ramchangkangah chuan zirna inah pawh blackboard chu greenboard-in an thlak vek tawh a, zirlaite tan rawng hring chu en a nawm zawk vang a ni. Zirchianna pakhatah chuan office-a hnathawk te pawh an tukverh atanga pawnlam thil hring an hmuh theih chuan an hnaah an tui a, an thawk chak a, an hlim a, an hrisel zawk bawk niin an sawi.
6. A var (white): US space agency NASA-in an hnathawk te zingah zirchianna an neihah room var leh eng lutukah chuan miin hna an thawk chak lo zawk tih an hmuchhuak tlat. Hei hi an bul vela rawng var leh êng lutuk chuan an rilru a lak pen thin vang niin an sawi. Chutih laiin rawng var chu mi tihah dam thei niin an sawi a, test pakhat an neihah chuan kut khur te chu room varah chuan an kut khur a ziaawm bik tih an hmuchhuak. Colour -psychologist Kate Nightingale chuan, “Rawng var hian thianghlimna leh rinawmna a lantir a, thawmhnaw var inbel pawhin min vawng bik riau zel a ni, doctor leh nurse te pawh a varin an inthuam thin hi,” a ti.
7. A dum (black): Rawng dum chu rawng chak taka ngaih a ni a, a thawm pawh a na bik a, miin thawmhnaw dum a inbel chuan a chet dana han tih deuh sawk sawk te pawh a awlsam bik riau. University of Florida-a mithiam ten zirchianna an neih pakhat hockey team hrang hrang jersey dum leh var an hak thlak tir a, jersey dum an hak chuan an player te foul vangin hremna an tawk hnem zawk tih an hmuchhuak niin an sawi.