Vogue World: Hollywood 2025 runway-ah milar rual

Vogue World: Hollywood 2025 runway-ah milar rual
Fashion leh cinema inchawm tawnin, Vogue World: Hollywood 2025 runway-ah Hollywood mailar te runway-ah an inthehthil a, Nicole Kidman, Angela Bassett leh Rege-Jean Page te pawh an catwalk zan zan e.
Fashion magazine Vogue hian film industry theme a hmangin, milar rual fashion show ‘Vogue World: Hollywood’ hi Paramount Studios, Los Angeles-ah an nei a, he event-ah hian milar rual inlanin, Ayo Edebiri, Julia Garner leh Jeff Goldblum te runway a inlan zingah an tel a, film hrang hranga costume designer te kutchhuak zulzuiin, Marie Antoinette, West Side Story leh Dune costume thlengin an he fashion show-ah an inthehthilh pui a ni.
He event hi milar rual punkhawmna a nih rualin ticket hralhna 100% chu Entertainment Community Fund-ah chhun luh a ni ang a, hei hi cinema lama inhmang te, actor te mai bakah thawktu hrang hrang harsatna tawk te chhawmdawl nan an hmang dawn a ni.
A runway show hi Baz Lurhmann direct niin, Nicole Kidman chu ‘Gilda’ film-a Rita Hayworth character theme a inthuamin, show hawngtuah a tang a, Kendall Jenner pawh Moulin Rouge film-a Nicole Kidman incheina theme a hmangin a inlan bawk.
A show hi act sarihah an then a, brand hrang hrang- Alexander McQueen, Louis Vuitton, Miu Miu, ALAIA, Marc Jacobs, Valentino leh Balmain te puiin, film genre hrang hrang-ah chanpual neiin, show-a inlan te thuam tur an buaipui ve thung.
He show-ah hian Edward Scissorhand, Marie Antoinette, Once Upon a Time in Hollywood, Black Panther leh Dune costume te an phochhuak deuh ber a, runway-a inlan zingaah hian Rege-Jean Page, Greta Lee leh Jodie Turner-Smith te pawh an tel a, Doja Cat leh Gracie Abrams te pawh an perform.
Runway show mai bakah he event chhimtu pawh milar rual niin, Hailey Bieber, Miley Cyrus, Lizzo, Cynthia Enrivo, Viola Davis, Rita Ora, Jennifer Hudson leh Hilary Duff te pawh show thlirtu zingah an tel.