RD hnuaia hmalakna in endik leh belhchian a dawl – RD minister

Thawktute inpekna azarah Rural Development hnuaia hmalakna chuan endik leh belchian a dawl thin tih RD minister Lalruatkima chuan a sawi.
Nilaini khan Aizawlah Rural Department department hnuaia scheme pawimawh kalpui dan thlirho niin, chak zawka kalpui dan tur sawi a ni a. Hmanpuitu RD minister chuan Mizoram RD hmalakna chu tha tih a hlawh avangin state danga atanga rawn zirtute an awm a, Puducherry RD minister pawhin a rawn zirchiang tawh tih sawiin, monitoring official tam tak phailam atanga lokalte pawhin an hnathawh an rawn endik thin tih a sawi.
RD hnuaiah tun kum 5 chhung khan scheme pawimawh tak tak kalpui a ni a. MNREGA phei chu India ramah ni 100 ah 100 kalpui thei awmchhun state kan ni, tiin, “Hei hi hlawhtlinna a nih bakah hrilen lai pawha chhuanchham awm loa chhungkaw tam tak kan awm theih phahna a ni,” a ti.
MzSRLM hnuaiah self help group (SHG) tam tak Mizoramah an awm tawh a, kawng hrang hranga hma lain sum an thawkchhuak mek tih Lalruatkima hian a sawi. PMAY(Grameen) – miharsate in sakna tanpuina pawh chak takin kalpui mek nia sawiin, “Third party avangin harsatna tenau awm mah se, kuminah chuan AWAAS+ pawh kan zo hman tura ngaih a ni,” a ti. Amrit Sarovar hnuaiah hmun tam takah lui leh tuihna khuah niin, heng hi ranvulh, huanthlai enkawlna bakah ei in atan leh thil danga hman tur a ni tih a sawi a. He hmalaknaah hian Mizoram chu a thawk tha ber zing ami a ni tih a sawi.
An department chu thingtlang mipui chawikanna atana department pawimawh leh thingtlang mite ta deuh bik a nih angin, RD-a thawkte chu officer lian zawk atang hnahniam zawk thawktu thlenga hawihawm, dawr nuam leh thingtlangmite tana dawr nuam ni zel turin minister hian a chah a. BDO te pawh an bialtu MLA te nen inlaichinna tha nei turin a chah.