RD minister-in hotute tlawn ching lo turin BDO-te chah

Block development officer-te chu hotute tlawn ching lo tur leh mi tlawn ringawta hmanhlel lo turin RD minister Lalruatkima chuan a chah.
Ni li awh tur block development officer (BDO) te tana intuaitharna hun buatsaih chu Thawhlehni khan Rural Development minister hian a hawng a. Conduct rules leh sawrkar hnathawk kaihhruaina dan hrang hrangin a sawi chu zawm tlat tura chahin, mipui rawngbawltu, public servant an nih angin, mipui tan harsatna siamtu niloa, mite tana malsawmna nih tum tur leh mipui rinngam ni turin a chah. An nungchang pawh uluk a pawimawh tih a sawi.
Sawrkar hnathawk chu mahni tan chauha thawk niloin, ram leh hnam tana thawk an ni tih an hriatreng a pawimawh, tiin, an hnathawhna kawngah hotute tlawn ching nilo tur leh mi tlawn ringawta hmanhlel ni lo tur a hrilhin, transfer chungchangah pawh hotuten an tihna hmun apiangah lungawi taka awm tum turin a chah bawk.
BDO-te chu sawrkarin policy a duan leh hmachhawp tam tak a siamte hlawhtlinna atana kutke ber an nih avangin an mawhphurhna a sang tih Lalruatkima hian a sawi a. India ram chu mipui sawrkarna, inthlang ram niin, sawrkar chak nei tur chuan policy leh sawrkar kal dan tur tul duangtu, legislator-te leh chu’ng dan leh hmachhawp duansa bawhzuitu, executive-ten an mawhphurhna theuh chak taka an bawhzui a, an tanrual a pawimawh tih a sawi.
Sawrkar hnathawk tam tak chu rinawm tak, hnaah pawh inpe tak leh taima tak an awm laiin, tam tak chu an pension hun nghak ringawt leh sum hmuhna atana hmang ringawt an awm tih sawiin, rinawm taka thawktu nih tum turin a chah.
Ni 4 chhung training-ah hian resource person hrang hrang atangin PMKSY Version 2.0, Soil & Water Conservation works, BADP, MGNREGS, SDGs, Poshan Abhyaan, Swacch Bharat Mission, SAGY/ VAGY, NRLM, GPDP, SECURE and geo-spatial planning leh PMAY(G) chungchang an zir dawn a ni.