SCERT, Mizoram-in, International Literacy Day denchhena 100 Days Reading Campaign a kalpui chu nimin khan a kharna hun hman a ni a. Reading campaign neih chhung hian Aizawla primary school leh middle school thenkhatah lehkhabu chhiar pawimawhna zirtir niin, sawrkar enkawl primary sikul 15-ah ‘reading festival’ neih a ni bawk a. Hei bakah Aizawl veng hrang hrang YMA aiawh mi pahnih theuh sawmin lehkha chhiar pawimawhna inzirtir tharna hun bakah naupangten lehkha chhiar an taihmak thar theihna atana hmalak dan tur sawihona hun te neih thin a ni bawk.
Hetianga SCERT Mizoramin hma a la hi a lawmawm hle a, lehkhabu chhiar thatna, hlutna leh pawimawhna inhrilhhriatna kawnga a taka hmalakna a kalpui hi an tih atana inhmeh tak a ni a, hma an lo hruai tawhna hi zirna in hrang hrang leh YMA te pawhin chhawm nung chho zel se a duhawm takzet a ni.
National Education Policy 2020 pawhin lehkha chhiar a ngai pawimawh a, zirlaiten lehkhabu an chhiar tam theihna tur ruahmanna siam turin a ti a. Hei bakah hian kum khat chhungin sikul bag tel lova ni 10 tal sikul kalna hun siam a, chutiang hunah chuan activity hrang hrang heng Quiz, Sports, Arts, vocational crafts etc. te buatsaih thin turin a ti bawk a. Heng activity neihna hun ’10-Day Bagless Period’ hi lehkhabu chhiarna hun atana buatsaih a remchang bawk awm e.
YMA lam pawhin lehkhabu chhiar hi an ngaih pawimawh avangin branch tin deuhthawin library an nei a ni a, hemi hmang pawh hian zirlai, higher chin hnuai lamten lehkhabu an chhiar tam theihna tura eng eng emaw programme siam a tangkai hlein a rinawm bawk.
Reading Campaign
Get real time updates directly on you device, subscribe now.
Prev Post
Next Post