Real-a contract pawtsei Modric

Croatia midfielder Luka Modric chuan Real Madrid-a kum khat dang cham belh leh turin contract thar a ziak a, an inremna thar ang chuan kum 2024 thleng Santiago Bernabeu club-ah a khawsa ang.
Season liamta 11 chhung zet Real thuam inbel tawh Modric-a Bernabeu contract neih lai hi a tawp hnai tawh a, tunhnaia rawn lar chho hluai Saudi Arabia Pro League nen sawizawm a ni hman hial a, mahse, Spanish giants-in an kianga kum khat khel leh turin an hmin thei ta a ni.
Kum 37 mi ni tawh Modric hian Real tana match 488 a khelh tawh atangin La Liga title pathum leh Champions League trophy panga a lakpui tling tawh a, kum 2012-a Tottenham chhuahsana Spain a pan hnuah Madrid team innghahna pawimawh a ni.
Kum 2018 khan Croatia chu World Cup final thlenpuiin, Ballon d’Or pawh a dawn phah hial a; a kum tam ve tawh deuh mah se Europe club inelna sang bera team ropui vuan zui turin Real thuneitute’n a lakah rinna an la nghat ngam.
Spanish khawpuia kum khat dang cham zui leh tura inremna thar a ziah hnuah Modric chuan Twitter kaltlangin ‘Home Sweet Home’ tih a tarchhuak a, Bernabeu-ah chuan a la hlim kal zel tih a puang.
Kumin nipui thawt lai hian Modric-a team-mate rualkhat Toni Kroos, Dani Ceballos leh Nacho Fernandez-te pawhin tum 14 zet European champion ni tawh team-ah hian contract an lo pawtsei ve tawh bawk a ni.
Real hian an midfield tichak zual turin tun nipui insuan hun lai hian England international Jude Bellingham chu Borussia Dortmund atangin an senglut fel tawh a, midfield-a hmun inchuhna hi a na sawt dawn a, chuai mawh Modric pawh a inthlahdah a rem lo ang!