Kananin ramtiam an hnaih leh hret

Beiseina nung insiam-thar lehin Thawhtanni zan Tata SK 712 Pro Volleyball League semi-final-ah Kanan chuan 3-0-in champion lai Bethlehem Vengthlang an hneh a, Luangmual nen champion nih an inchuh dawn.
Trophy pathum la chunga season khar an tumna Kananin an kalpui zel a, Ningani zanah a vawikhatna’n Pro Vo-lleyball final an khel dawn. Champion turin an hneh loh tawh Luang-mual lakah danglamna an mamawh a, hmabak hlen tur an nei.
R. Dengthuama In-door Stadium, Mualpuiah Kananin thawhhona tha an lantir a, 25-12, 25-17, 25-17-a an chak rualin an khelh tawha an chetthat ber a ni hial awm e.
June ni 8 khan Be-thlehem Vengthlang nen intawng tawhin 3-1-in an chak a, mahse, league an khelh hnuhnun berah Luangmual an hneh lova, an khelh danah Kananin beisei an pha lo.
Bethlehem Veng-thlang erawh an khelh hnuhnun vawi hnihah an chak zawn a; inkhel pawimawhah an tlawm tawhna chhanglet tura inrintawkna an neih thar leh lai takin Kanan hniam lai an tawng.
Hei hi thil awmdan ni mah se team pahnih player-te theihna a insan hleih tih Kananin an lantir nawn leh zawk a, an khel a puitlingin a felfai. Inelna sangah ho taka tihsual nei mang loin insawrbing takin inkhel an thunun tluan.
R. Laltleipuii’n point khat chiah hlohin tum 16 a vaw tla a, D3 Business Player of the Match lawmman a dawng. Lalramliani’n point kua leh Lalhriatpuii’n point sarih an hmu a, vawi khat ve ve chiah an tisual.
A tir atangin a bo-ruakah Kanan an chung-nung nghal a, Bethlehem Vengthlang innghahna Elisian Medai’n line pawnah vaw chhuakin, Chinglunkimi’n a vaw kai lo zui ve leh a, 23-10-in an sang a, an inel tawk lo.
A hnu zelah thil awm dan a danglam tam lo. Khela bet zawk an nih miau avangin Bethlehem Vengthlangin lehlam vuak lak tumin hun an hmang tam a, Mizo spiker tha ber pawl Elisian-i’n a theihna hmang chhuak turin hun tha a nei tam thei lo.
2022 Pro Volleyball player tha ber leh Be-thlehem Vengthlang cham-pion-puitu Serkawn nula hian point 10 thawk-chhuakin point sarih a hloh. Ball tha a hmuh tam tawk loh piahlamah Ka-nan player-te’n net bula a ball hlap an dansak thin bakah an laksak hnem.
Lalramengi Ralte chuan tum ruk hlap thlain vawi khat chiah tisual mah se Bethlehem Vengthlang a chawikang zo lo a, Kanan tan player-te’n awmze nei tham takin an khel ve thung.
Tleipuii’n a hlap tlak zawn hnuah tha taka a service atangin point a hmu zawn leh a, 24-16-in an kalsan. Lehlamin point khat bak hmuh belh thei loin Lalbiakngheti’n set an lak zawnna’n a beng thla a, a vaiin point sarih thawkchhuakin vawi thum a hloh.
Set thumnaah Elisian chuan vawtlain Bethle-hem Vengthlangin 14-14 thlengin nih rual chho mah se kum lama naupang leh thiamna tlachham zawk an nihna a lang zui leh a; 23-17-a Kananin hma an hruai laiin Tleipuii’n a hlap tla a, lak theih lohin a service zui leh nghal zat a ni.