Real beiseina chau zel

Real beiseina chau zel
Beiseina chau taka an la um ve tek tek Barcelona chak zanah Spanish gianst chuan sihnih faiin mualneitu Real Sociedad an hneh lo a, khelh nga chiah awm tawhah point 14 zeta hmahruaitu Barca an thlauh tawh avangin an tan title humhim beiseina a chau takzet tawh a, khelh hmabak an la neihah hian chak fai vek pawh ni se point 83 bak an puitlin zo tawh dawn lo.
Real Madrid hian first half-ah an lama goal lut tur dang tluan thei mah se second half-ah sihnih an chhuah a, a hmasa zawk chu minute 47-a Takefusa Kubo tihluh niin, Eder Militao leh Thibaut Courtois ‘backpass’ fuh lo hrinchhuah a tih theih a; minute 61-ah mikhual team buaina belhchhahin right-back Dani Carvajal hnawhchhuah a ni a, a tlem zawk ni chungin Real an erlet zo lo mai ni loin goal khat dang an chhuah belh leh.
Sociedad goal hnihna hi hun pangngai tawp hma minute nga chiah awm tawha substitute Ander Barrenetxea thun niin, veteran midfielder David Silva thawhrah tiin a sawi theih a; Ber-nabeu club tan Spanish La Liga title humhim beiseina a chau takzet tawh a, Real Sociedad tan season thara Cham-pions League khelh phak beiseina a sang chho leh hret thung.
Thawhlehni inkhel hmasa lamah hmahruaitu Barcelona an chak tawh avangin Real tan chak ngei ngei ngaihna a sang a, mahse, table-a palina luahtu team lakah an player pawimawh rual-khat – striker Karim Benzema, winger Vi-nicius Junior, midfielder Luka Modric leh centre-back David Alaba-te chu an hma lawka inkhel pawimawh pahnih awm avangin an khekkhal a, kut bengin San Sebastian khelmual an chhuahsan lo thei lo!
Madrid hian season kal laiah trophy beisei theih dang an la nei a, pakhat chu Copa del Rey title niin, Inrinni final-ah Osasuna an hmachhawn ang.
Chumi atanga ni-thum lek hnu Cham-pions League semi-final first leg-ah Manchester City an mikhual zui leh dawn a ni.
An star player enge-mawzat inlan thei lo mah se Ancelotti team-in inringtawk tak chung-in Real Sociedad mual-ah bul an tan tho a, home keeper Alex Remiro tan pawh hna tau a tet har lo a, mahse, Militao goal tur a dan rualin he goal-veng hian Los Blancos hmahruaina tur a dansak tel!
Thahrui chak tak leh hriam takin Real So-ciedad lamin an nawrlet qa, inkhel thununin, chawlhlawk hma mai pawh khan goal thun theihna hun remchang an siamchhuak nial hman a, second half-ah phei chuan an hlawhtling rang ta hle a nih kha!