Real-in hnehna changlet leh ta…

Madrid derby-a an chak tluang lai tihtawp a nih hnuah Real Madrid chuan Nilaini zan khan sihnih faia Las Palmas hnehin La Liga table-ah pahnihna an luah chho.
Santiago Bernabeu inkhelah hian chawlhlawk dawn hun pekbelh minute thumna a kal mek laiin Brahim Diaz chuan mualneitu team hmahruaina goal a khung a, season kal laia a goal khatna a ni nghe nghe.
Second half tir lam minute 54-ah Joselu chuan sihnih faia Real hmahruaina leh chiang lehzual zawka mualneitu team chakna goal a tauhlut ve leh a, goal dang khungbelh tawh lo mah se Spanish giants hian nuamsain an kawtkaiah hnehna an chang.
Carlo Ancelotti team hian first half thunun hneh hle mah se goal thun an harsat a, chawlhlawk hmain goal a lut dawn tawh lo emaw tih hnuah Brahim chuan a khaklut hram a ni.
Madrid boss hian Atletico an hneh loh tuma luh hmasak chang player panga kha thlakin Las Palmas lakah mithar panga a luhhmasaktir a, chawlhahdam zingah Real a zawm hnua chetha em em chunga Madrid derby-a goal thun zo lo Jude Bellingham a tel.
A player tha thenkhat chawlhtir mah se home team-in kawng engkimah an chungnun zawkna an lantir a, mahse, first half chhung ringawta save vawisarih ngawt nei tling Las Palmas goalkeeper Alvaro Valles paltlang an harsat tlat a ni.
Half time dawnah Lucas Vazquez siamsak atangin Brahim chuan season kal laia Real tana a league goal hmasaber a thun thei hram a ni.
Los Blancos goal hnihna thuntu Joselu khan veilam sir atanga Rodrygo cross nangfuhin Valles ven goal-ah a tilut ve leh a, Bellingham leh Luke Modric tel loin Real-in hnehna nuamsa an chang.
Bernabeu club tana chanchin lawmawm dang leh chu fit-again Vinicius Jr khelmual lut leh thei ta kha niin, kumin August thla tawp lama a inhliam atang khan a vawikhatna’n bench thawhsanin khelmual a lut leh thei ta a ni.
Nilaini inkhel dangah si phur hmasa chunga mualneitu Villarreal laka 2-1 hnehna changkirleh Girona chuan beiseiloh takin La Liga table-ah hma an hruai a, legue khelh sariha vawiruk hnehna chang tling tawh Catalonian-ho hian point 19 hum chungin hmahruaitu nihna an chelh thar a, khelh sariha point 18 nei Real nen point khata inthlauin, table ler atanga pathumnaa chhuk leh ta rih Barcelona-in point 17 an kawl ve bawk.