Rubiales rualin Vilda chhui tel

Spain hmeichhe football team head coach nihna atanga an ban tak Jorge Vilda chu Luis Rubiales criminal case-ah chhui tel ve a ni.
Tarlan tawh thin angin, kumin hmeichhe World Cup-a Spain an champion tum August ni 20 khan khatih laia Spanish Football Federation (RFEF) president Luis Rubiales chuan champion lawmman sem laiin Spain forward Jenni Hermoso hmuiah a fawhsak a, player hian a remtihna tel lo a nih thu a sawi laiin Rubiales hian an pahniha inhriatthiamtawnna tiin a sawi thung a; a hnuah Hermoso hian court-ah an chungchang chu pulutin Rubiales chu criminal case awrhtir a ni a, head coach atanga an ban tak Vilda thlengin a kangkai ta a ni.
Spanish media report tarlan danin Vilda hi tihluihna hmanga Spanish FA-in a fawhna kawngah khan chhui tel a ni a, report-in a tarlan zel danin, head coach a nihna zawnah Hermoso chu Rubiales tan zawnga khawsa turin a nawr a, player mai bakah player thiante leh chhungte thlengin Rubiales tan zawnga khawsa turin a nawr niin an sawi a, he puhna hi Vilda chuan pha hul vek mah se thlathar October ni 10 khian Spain ram National Court-ah a inlan zui dawn ta tho a ni.
Rubiales leh Vilda bakah hian midangte pawh an kangkai zel a, men’s national team director Albert Luque leh RFEF director of marketing Ruben Rivera-te pawh a president hlui thubuai kaihhnawihah hian chhui tel niin, a hma khan thuhretu anga koh an lo ni tawh bawk.
Thubuai an chhui laiin Rubiales hi Hermoso hnaih lo tura hriattir niin, Hermoso chu metre 200 aia hnaia a thlir pawh phalsak a ni lo! Metre 200-a hla atangin a bye bye thiang chauh!
Tunah chuan Spain hmeichhe football team pawh an pangngai chho leh tawh a, tunkar Thawhlehni khan kumin World Cup hnu lama home match an khelh vawi-khatnaah 5-0-in Switzerland an sawp.
Cordoba khaw inkhel tan dawnah player-te’n banner an lekchhuak a, tah chuan ‘Khawvel hupa kan beihna chu tawp ta’ tih a inziak a, Spanish football-a an thilphutte a hlawhtlin tawh thu leh team boruak a pangngai leh tawh thu khawvel hriatah an puangzar.