UEFA Champions League (UCL) last 16 thawhkhata (first leg) chu zanin atangin khelh tan a ni dawn a. Zanin a inlan tur zingah champion lai Real Madrid leh English club lian Arsenal te an tel.
Champion lai Real Madrid hian Madrid derby an khel dawn a, Santiago Bernabeu-a Atletico Madrid an mikhual dawn. An mikhual tur Atletico Madrid hi La Liga-ah an chunga awm mek an ni a, Carlos Ancelotti team te hian fiahna hautak an hmachhawn a ngai dawn. Real Madrid hi La Liga an khelh hnuhunung berah an tlawm a, Inrinni zana an khingpui Real Betis lakah 2-1 in an tlawm. Betis lakah an tlawm vangin table-ah pahnihna atangin pathumnaah an hnungtawlh. Real Madrid an tlawm lai hian Atletico Madrid chuan Real Sociedad lakah hnehna an chang ve thung a, hma lam an pan ve thung.
La Liga-ah tlawm pawh ni se, La Liga-ah 1-1 a an inhnehtawkpui pawh ni se champions league a ni miau a, Real Madrid tan Atletico Madrid hi huphurhawm an ni kher lo ang. Champions League-a vawk lallen an ni tlat a, champions League-ah chuan an dangam bik thin. UCL-a danglam a, khel tha tlat thin chu Real Madrid hi an ni a. An khingpuite tan engtiklai mahin zuam chi an ni lo. Result chu eng pawh ni se Santiago Bernabeu-ah inkhelh hmuhnawm tak kan hmuh ngei a rinawm.
Real Madrid leh Atletico Madrid an inkhelh lai hia English club lian Arsenal chuan Philips Stadion-ah Dutch club lian PSV Eindhoven an luhkhung ve dawn thung. Gunners hi UCL-ah an khel tha viau a. Netherlands club PSV lakah hnehna chang thei tura ngaih an ni.
Real leh Arsenal inlan zan
Get real time updates directly on you device, subscribe now.
Prev Post
Next Post