2025 Oscar-ah Anora a langsar

2025 Oscar-ah Anora a langsar
An rama Pathianni zan, keini tana Thawhtanni tuk khan lemchan lama chawimawina sang bera khawvelin a neih Academy Awards, Oscar an tih bawk chu kumin atan an sem leh ta a, Anora a langsar ber a, Best Picture a dawn bakah, he film changtunu Mikey Madison chuan Best Actress a dawng bawk.
Hollywood tana zan ropui tia an sawi thin Oscar award hi Dolby Theatre, Los Angeles-ah sem a ni a, a vawi khat nan Conan O’Brien-a’n a host
Best Picture-ah hian Anora, A Complete Unknown, Wicked, The Brutalist, Conclave, Dune: Part Two, I’m Still Here, The Substance leh Emilia Perez te awmin, nawhchizuar thin, Russian pahausa nena innei ta chanchin tarlanna Anora chu Oscar-a award ngaihhlut ber Best Picture dawngtuah a tang ta a ni.
Best Picture award dawng tur hian producer Alex Coco leh Samantha Quan leh director Sean Baker te an ding chhuak a, Sean Baker hian ‘Anora’ avangin Best Directing, Best Original Screenplay leh Best Film Editing te a dawng tel a, zan khat thil thua heng award chi thum dawng vek thei pahnihna niin, hetiang tithei dang awm chhun hi 1954 kuma Walt Disney chiah a la ni.
Baker, kum 54, hian record tar siamin, Academy Awards history, kum 97 chhunga zan khat thil thu a film pakhat avanga award pali dawng thei hmasa ber a ni bawk.
Coco chuan Best Picture award dawn lawmthu sawinnaah, “Ka movie hi dollar maktaduai 6 sengin, New York City-ah crew 40 vel nen kan siam a ni a. An vaiin New York-ah an awm vek. Hei hi nangmahni tan a ni. Kan lawm tak zet e. He movie hi mahni tawka kan siam ve liau liau a ni. Hetiang independent film hi insiam duh a nih chuan tizel rawh u. A dang tam tak kan mamawh. Hei hi a tihchianna chu a ni,” a ti.
Quan pawhin, “Kan crew mi tlemte, mahse, thil tithei tak, a changtu talent nei tha tak tak, mi duhawm tak Mikey Madison kaihhruaina nen. Sum tlemte chauh sengin kan siamnain, kan thinlung zawng zawng kan leihbuakna a ni. Film siamtu naupang zawk leh suangtuahna nena thlir ve tute zawng zawng kha in thawnthu duh zawng chu tichhuak rawh u. Ka tiam che u, in inchhir hauh lo ang,” a ti ve bawk.
Baker chuan, “A tawp nan pakhat chauh, independent film min lo ngaihhlut sak avangin Academy chungah lawmthu ka sawi. He film hi a changtu leh buaipuitu zawng zawng teh thi leh thau pawlha kan sual chhuah a ni,” a ti bawk.
Best Picture bakah Anora hi category dang paruk-ah nominate a ni a, a changtunu Madison chuan Actress in a Leading Role-ah award a dawng tel bawk.
Kumin Oscar-a hian Emilia Perez chu nomination-a langsar ber niin, nomination 13 a nei a, The Brutalist leh Wicked ten nomination 10 ve ve neiin an dawt. Emilia Perez hi Golden Globes leh Screen Actors Guild Awards-ah te a chetha bawk a, Oscar award pawh dawng nual tura beisei niin, Best Picture-ah rinkai zinga mi a ni a, mahse, he film-a changtunu, Best Actress nominee Karla Sofia Gascon chuan tunhma lama Muslim leh pawl dangte a beihna tweet dengkhawng tak tak an hailan leh avangin sawiselna a dawng nasa hle a, hei hi award-ah pawh a tuar ta deuh niin a ngaih theih.
Award semnaah hian Cynthia Enrivo, Ariana Grande, Doja Cat, Queen Latifah leh BLACKPINK member Lisa te pawh an perform a, award presenteer zingah ike Halle Berry, Sterling K. Brown, Penélope Cruz, Whoopi Goldberg, Selena Gomez, Scarlett Johansson, Emma Stone, Oprah Winfrey, Harrison Ford leh Bowen Yang te pawh an tel.
Oscars 2025 Winners:
Best Picture : Anora
Best Actress in a Leading Role : Mikey Madison – Anora
Best Actress in a Supporting Role : Zoé Saldaña – Emilia Pérez
Best Actor in a Leading Role : Adrien Brody – The Brutalist
Best Actor in a Supporting Role : Kieran Culkin – A Real Pain
Best Directing : Sean Baker – Anora
Best Makeup and Hairstyling : Pierre-Olivier Persin – The Substance
Best Live Action Short : I’m Not a Robot
Best International Feature Film : I’m Still Here
Best Film Editing : Anora
Best Costume Design : Paul Tazewell – Wicked
Best Original Screenplay : Sean Baker – Anora
Best Adapted Screenplay : Peter Straughan – Conclave
Best Visual Effects : Dune: Part Two
Best Sound : Dune: Part Two
Best Production Design : Nathan Crawley – Wicked
Best Original Song : “El Mal” written by Clement Ducol, Camille & Jacques Audiard, performed by Zoé Saldaña and Karla Sofía Gascon – Emilia Pérez
Best Original Score : The Brutalist
Best Cinematography : Lol Crawley – The Brutalist
Best Animated Feature Film : Flow
Best Animated Short Film : In the Shadow of the Cypress
Best Documentary Feature Film : No Other Land
Best Documentary Short Film : The Only Girl in the Orchestra