Real Madrid an chak lo

Thawlehni zan khan Spanish La Liga khelh chhunzawm a ni a, champion lai Real Madrid chu Girona hneh lovin an tlawm. Nilai zan ah hmahruaitu Barcelona an chak a nih chuan Real Madrid nen an inkarah point 14 zet a tlazep tawh dawn a, Real Madrid tan champion beisei ngam a ni tawh lo hial ang.
La Liga table-ah 11-naa awm mek Girona hian champion lai Real Madrid lakah an khel tha viau a, Valentín Caste-llano chuan goal li ngawt a thun nghe nghe. An muala inkhel mah nise hnehna chang tura rinkai ni phak lo Girona tan hian minute 12-na lekah Valentín Castellano chuan Gutiérrez siamsak atangin hmahruaina goal a thun. Fuh taka an mikhualte nawr tlang a, mawi taka ball an inpek kual hnuin Castellano hian chiang zetin a lo tauh goal.
Hma taka goal an thun hian Girona a fuih phur viau a, huaisenna an neih belh viau bawk. Ngam takin an mikhualte an nawr a, minute 24-naah goal dang an thun belh leh. Hmahruaina goal thuntu Valentín Castellano chuan hla tak atanga ball a hmuh chu fuh zetin a khal tlang a, Real Madrid si nghak Thibaut Courtois dan rual lohin a pet goal. Si hnih ngawta hma an hruai vangin Girona player leh an khelmuala mipui pungkhawmte an phur viau a. Real Madrid hmelma lian ber Barce-lona tantute an lo phur viau bawk.
Si hnih an phurh hnuin champion lai Real Madrid an insiamtha a, chawlhlawk hmain goal an thun ve ta nge nge. Minute 34-naah Marco Asensio ball vawrh luh tha tak chu Vinicius Junior chuan awlsam takin a lo tauh goal a, an si phurh a sut then. Vinicius Junior goal thun hnu hian chawlhlawk hmain goal dang a luh belh tawh lo.
Chawlhlawk hnu lamah Girona an khel tha chhunzawm a, goal hnih an thun belh leh. Second half tan atanga minute khatna lekah mawi taka Real Marid tlarhnung an thiah darh hnuin Caste-llano chuan chiang zetin a pet goal a, hattrick a siam. Castellano vek hian minute 62-naah hnaite atangin a tauh goal zui leh a, team goal lina leh a mimal goal lina a thun. Castellanos hian New York City atangin Girona hi loan in a zawm mek a, Girona player zingah Real Madrid laka goal li thun thei hmasa ber a ni ta hial.
Si thum ngawta an hnufual hnuin Real Madrid tan minute 85-naah Lucas Vázquez chuan goal thunin an si phurh a sut then naa, goal dang an thun belh theih tawh loh vangin an tlawm zui ta tho thung. Girona lakah an tlawm vangin Real Madrid in Barcelona nen an inkar tihzim an tumna a thlawn a. An hmelma lian ber Barcelona nen hian an inkarah point 11 zet a tla zep mek a. Catalan club lian Barca hian nilai zanah Rayo Vallecano an hneh a nih chuan point 14 zetin hma an hruai fal tawh dawn a. Khelh hmabak game ruk chiah a awm tawh vangin Barca hi champion tluk an ni hial tawh ang. Real Madrid lakah goal li ngawt thuntu Valentín Castellano khan MLS lamah pawh goal a thun thei viau a, kum 2021 khan MLS-ah game 32 atangin goal 19 a thun a, topscorer a ni. MLS-ah hian goal 50 thun tling thei naupang ber a ni tel bawk. Argentina tan la khel phak lo Kum 24 mi Valentín Castellano hian MLS a pan hmain Chile leh Uruguay ah football a lo khel tawh thin bawk