Real Madrid an mualpho

Manager Xabi Alonso an ban vanga sawiselna tinrengin a bawm, an nungchang vanga an player ten tlang rel an tawh a, phur rit tak an phur laiin Spanish Copa del Rey-ah Real Mdrid an mualpho a, second division team Albacete hneh lovin an tlawm. Champion tura rinkai ni chunga second division team hneh lova an tlawm vangin Real Madrid an mualpho a, sawisel an hlawh na leh zual hle. Tunkar hi Real Madrid tan chuan chawlhkar duhawm lo zet mai a ni a, an tan hawi ngaihna awm lo a ni ber mai.
Khawvela football club hlun, hause leh hlawhtling ber Real Madrid hi second division team Albacete hmachhawn turin Carlos Belmonte-ah an leng lut. An khingpuite hi Segunda División-ah 17-na ni mek an ni a, harsatna tawk lovin an hneh thei tura ngaih a ni. Team lian hmachhawn dawn lo mah se manager lailawk Alvaro Arbeloa enkawl hnuaia an inlan hmasak ber tur a nih vangin ngaihven a hlawh tho thung. Manager lailawk Alvaro Arbeloa hian hnehna nen bul tan theihna hun tha nei bawk mah se hnuhma chhia a hnutchhiah ta zawk a, Real Madrid manager zingah Copa del Rey-a tlawm nghal awmchhun a ni nghal.
Real Madrid an hmachhawn phak vanga lawm a, insawi theih nan taka hmang tawh Albacelte hian an mualah rin phak baka thain an khel a, goal thun hmasa zawkah an tang ta hian. Chawlhlawk dawn hnaih minute 42-naah Javi Villar chuan hmahruaina goal a thun a, Real Madrid a barakhaih. Goal chhuah hmasa bawk mah se Real Madrid an hawihai rei lova, Franco Mastantuono chuan minute 45+3-ah goal thunin an si phurh a sut a. 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Albacete chu rin aiin an tang thei zui zel a, goal thun hmasa zawkah an tang nawn leh. Hun tawp dawn hnaih minute 82-naah Jefté chuan hma an hruai nawn lehna goal a thun a. Real Madrid an barakhaih nawn leh.
Si an phurh nawn leh hnuin second division team laka tlawm hreh em em Real Madrid in tan an khawh thar leh a. Gonzalo García chuan minute 90+1-ah goal thunin an si phurh a sut. An si phurh an sut vangin hun tlemte la awmah chak let thei turah an inngai a, an hlauthawng lo viau. Hlauthawng lo ngawt mah se Albacete tan Jefté chuan minute 90’+4-naah hma an hruai nawn lehna goal a thun zui leh ta mai a. He goal hmang hian tam lian Real Madrid lakah hnehna chhinchhiahtlak zet mai an chang zui ta a ni.
Pathianni zan mai khan Real Madrid hi Super Cup final-ah Barcelo hneh lovin an lo tlawm tawh a. Copa del Rey atanga an tla zui leh hi a na hle ngei ang.