Real Madrid in Chelsea an hneh phawt

April 12, Nilai zan khan UEFA Champions League (UCL) quarter-final khelh chhunzawm a ni a. Champion lai Real Madrid chuan Santiago Bernmabeu-a an mikhual Chelsea chu si hnih faiin an hneh. Serie A club lian pahnih inkhelah AC Milan chuan Serie A champion thar ni mai tur Napoli chu si khat faiin an hneh ve bawk.
EPL club kawng daltu Real
Last 16-ah 5-2 ngawta Liverpool lo sawp tawhtu Real Madrid chu EPL club te kawng daltuah an tang chhunzawm zel a. London club lian Chelsea lakah si hnih faia an chak vangin UCL roreltu Real Madrid hian semi-final an hnaih kuarh a. Semi-final-ah EPL club lian Manchester City hmachhawn thei dinhmunah dingin, final an lut a nih chuan EPL club lian pathum ngawt an pet thla dawn tihna a ni.
Thlasik bazar laia player lei nan sum seng hnem fal Chelsea hi EPL-ah beisei phak lo takin an inlan a, 11-naah daih an awm mek. Season kal mekah champion an beisei theihna awmchhun chu champions league hi a ni tawh a. Season tharah champions league an khelh phak theihna awmchhun chu UCL a champion chiah hi a ni tawh bawk. Heti hi a nih vangin Blues tan champions league hi a pawimawh em em tawh a, inelna dang dah thaa an insawrbing theihna a nih vangin an hlauhawm tura ngaihna lian tak a awm bawk. Santiago Bernabeu-ah thil mak an thlentir theih beiseina awm bawk mah se, si hnih faiin an tlawm a. Manager thar Frank Lampard hnuaiah an tlawm zawnna a ni chiah bawk.
Chelsea hian Real Madrid lakah bul an tan tha a, inkhel tan atanga minute hnih tlin hmain goal thun theihna hun tha an nei nghal. Fuh taka an khingpuite an nawr tlang hnuin Joa Felix chuan a khalh fal a, goal thun theihna hun tha nei bawk mah se Real Madrid si nghak Thibaut Courtois a paltlang zo lova, uiawm takin hun tha a hlah.
Thibaut Courtois chetthat vanga an him hram hnuin Real Madrid an hlauhawm zui a, minute 11-naah tha takin an mikhual nawr tlang mah se Karim Benzema chuan si nghak Kepa a paltlang thei bik lo. Hun a kal tam hret a, Carlo Ancelotti enkawl Real Madrid in an mikhual Chelsea an thunun telh telha, goal pawh an thun ta nge nge. |ha taka an nawr tlang hnuin Karim Benzemna chuan si nghak Kepa dan per chu minute 21-naah awlsam takin a pet goal a, hmahruaina goal a thun.
Si an phurh hnuin Chelsea in an khingpuite an nawr zui leh nghal chat a. Goal thun theihna hun tha an neih chu si nghak Courtois bawkin a tihthlawnsak leh a, Raheem Sterling pet chu pui taka dangin, an team a chhan him nawn leh. Sterling-a’n hun tha a neih hnu lawk hian Real Madrid pawhin hlauhawm takin an nawr tlang leh a, an hun tha an hlah ve bawk. Real hian hun tha dang nei bawk mah se chawlhlawk hmain goal an thun belh theih lo.
Seconc-half tan tirh lamah Chelsea tan beidawn leh zualna tur a thleng. Box pawnah Rodrygo a tihtluk vangin defender Ben Chilwell hnawhchhuah a ni. Champion lai lakah si phur zawk ni chunga tlem zawk an nih leh zel vangin London club tan chet a har tawh a, an si phurh an sut thei lo tluang. Chelsea in goal an thun theih loh lai hian minute 74-naah Marco Asensio chuan Vinicius Junior siamsak atangin an goal hnihna a thun a, si hnih faiin an chak zui ta a ni.
Real Madrid lakah goal an thun theih loh vangin Chelsea hian match li chhung a zawnin goal an thun thei ta lo va, hei hi kum 1993 hnu lamah goal an thun theih loh zawn rei ber tum niin hun duhawm lo tak an tawng mek. Inrinni zana an mikhual tur Brighton lakah goal an thun zo lo leh a nih chuan record chhe leh zual an hnutchhiah ang.
Manager ngaihdan a thuhmun
Real Madrid in si hnih faia Chelsea an hneh hnu hian manager pahnih Frank Lampard leh Carlo Ancelotti ten ngaihdan thuhmun an nei a. Chu chu second leg-ah inlehthalna a la thleng thei tih thuah a ni.
Chelsea manager Frank Lampard chuan April ni 18 zanah Stamford Bridge-a Real Madrid an mikhual hunah thil danglam bik thlentir ngei an tum thu a sawi a. Real Madrid lehthalin semi-final luh ngei an tum thu a sawi.
Real Madrid manager Carlo Acelotti pawhin semi-final lut tur zawk a la chiang loh thu sawiin, intihsiakna a la tawp lo thu a sawi ve bawk. Ancelotti hian a club hlui Chelsea fakin, “player tha tak tak an nei a, inlehthalna thlentir turin theihna an nei. Semi-final luh tuma inelna ala tawp lova, inthlahdah thei kan la awm lo” a ti.
Thawhleh zana inkhel dangah Serie A champion AC Milan chuan an mikhual Serie A champion ni mai tur Napoli chu minute 40-naa Ismaël Bennacer goal thun hmangin an lo hneh ve bawk.