Inrinni zan Spanish La Liga inkhel pakhatah an mikhual laka point thum hlawhchhuak zo loin Atletico Madrid nen sikhat ve ve thunin an inhnehtawk a, hma-hruaitu Barcelona lakah point sarih ngawtin Real Madrid an hniam tawh a, nizan result tarlan hman lohah Catalan team hian Almeria an hneh chuan Xavi Hernandez-a team hian point 10 ngawtin hma an hruai fal thei tawh ang a, Bernabeu club tan an title kawl lai humhim beiseina a chau hle tawh ang!
Madrid derby-ah Carlo Ance-lotti team hian first half thunun zawk mah se chawlhlawk hmain goal an khung zo lo a; second half tir lam minute 64-ah a kiu hmanga Antonio Rudiger a nghawk avangin half-time substitute Angel Correa chu straight red card hmanga hnawhchhuah niin, a tam zawk an nih hnuah pawh Real-in goal an la tilut thei ta chuang lo mai ni loin si phur hmasa zawkah an la tang ta dah a!
Minute 78 an khel tling tihah Antoine Griezmann free-kick atanga ball chhuak atangin substitute Jose Gimenez chuan rin loh takin mikhual hmahruaina goal a thun nawlh a, kum 2016 hnu lama a vawikhatna atan Atletico-in Bernabeu-ah hnehna an chang thei mai dawna ngaihna a piang hman!
Chu em erawh thleng zui loin hun pangngai tawp hma minute nga chauh awm tawhah rawlthar Alvaro Rodriguez chuan Luka Modric-a corner chhuih atangin Atletico Madrid goalkeeper Jan Oblak-a dan zawh loh goal a thun a, a club vawn lai tana a goal hmasaber a nih rualin kum zabi 21-naa Madrid derby La Liga game-a goal khung thei naupang ber a ni zui nghal.
Tarlan tak angfin, first half-ah khan mualneitu team-in ‘clear-cut chance’ han tih tur ang chi neiin, Marco Asensio chuan Jan Oblak-a ban a paltlang zo lo a; chutih laiin Atletico tana hun remchang hmu Yannick Carrasco pawhin Thibaut Courtois zawn taka chhuihin hmahruaina goal a hlawhchhuak zo bik lo.
Second half-ah Correa red card hmuh vangin game a nung zual a, thil thleng dang chu a chunga tarlan tak ang hi a ni.
Hun tawp dawn hnaihah Eduardo Camavinga chuan Oblak enchhin zuai bawk mah se Atletico Madrid-in goal dang an chhuah belh duh tawh bik lo a, table-ah palina luah chhunzawmin, an hnuai chiaha pangana luahtu Real Betis lakah point hnihin an chungnung.
Atletico tana chanchin lawm-awm lo chu first half-a Federico Valverde nen an insutna lama an left-back Reinildo inhliam kha niin, khup hliam chimawm ber chi (anterior cruciate ligament rupture) a ni tih nemngheh a ni a, tun season kal laiah a team tan a inlan theih tawh a rinawm loh.
Inrinni Bernabeu inkhel kha Diego Simeone tan Atletico manager ni chunga inelna hrang hrang belhkhawma game 612 a khelh tlinna chiah niin, coach ropui mual liamta Luis Aragones club record a nihrualpui.
Real Madrid title hum beiseina pan zel
Get real time updates directly on you device, subscribe now.
Prev Post
Next Post