Real Sociedad 0-1 Barcelona

Hun pekbelh minute hnihna a kal mek laia Ro-nald Araujo goal thun hmangin Sociedad mual-ah Barca an chak hram a; Ilkay Gundogan siam-sak atanga a goal tihluh kha kum 2022 March thla El Clasico hnehna an chan hnua Araujo league goal hmasaber a ni.
Barca defender goal awmchhun kha video assistant referee endikna paltlang hnua goal-a puan niin, Gundogan-a cross chu Real Sociedad goalkeeper Alex Remiro kapkarah a thawnlut a, a tirah offside flag phar khum a ni zet a, VAR inrawlh nuah offside-a puhna chu hnawl a ni.
Inrinni inkhelah khan mualneitu team lamin goal thun theihna hun remchang nei ngah zawkin, Takefusa Kubo leh Martin Zubimendi goal tur chu Catalan goal-veng Marc-Andre ter Stegen chuan a dansak a; a tir lamah an chakna goal tih loha Barcelona goal chance tha ber chu Gavi shot niin, Remiro a paltlang zo bik lo.
He result avang hian Barcelona chuan La Liga table-ah pathumna luah chhoin, mak tak maia hmahruaitu ni chho Girona lakah point liin an hnufual a; Real Madrid chu pahnihnaah chhukin, nizana an bitum Rayo Vallecano laka an result hlawhchhuah azirin a lerah an chho leh thei ang.
Barca thenawm club Girona hian Inrinni zan inkhelah dangah 4-2-in mualneitu Osasuna an hneh a, Bernabeu club pawtthlain league hma an hruai!