Real tan Mbappe goal bawk!

A club thar tana a bul tan tirh lamah han zumzuk deuh mah se Spain leilungah pawh goal leh Kylian Mbappe ke a inzawm nghet chho kal tluang leh mek a, Inrinni zan La Liga inkhel pakhata 4-1-a mikhual Espanyol an sawpna inkhelah pawh goal khat thawh lehin, Vinicius Junior-a goal tur a chhawpsak bawk.
Ti hian, kumin nipui insuan hun laia contract a hman zawhpui Paris St-Germain chhuhsana Real Madrid a zawm hnua a club thar tana game riat a khelh tawh atangin France captain Mbappe hian goal ruk zet a khawl tling leh der tawh a, khawiah tak tak mah insiamrem tura hun a duh rei lohzia a lantir chiang hle!
Spanish top flight bikah chuan France tana World Cup trrophy vawikhat hawna World Cup final vcawikhat dang khel tawh bawk Kylian Mbappe hian game thum khelh atangin goal li zat a khawl tling tawh a, he nau hi Real Madrid innghahna lian a ni chho dawn tih a chiang leh hle tawh!
Santiago Bernabeu stadium-a mipui 17,284 lek pungkhawm hmaah Spanish giants-in inkhel thunun nghet hle chungin first half-ah goal an khung zo lo thak!
Second half-ah pawh a chechhe hmasa zawkah tangin, thah khatna atanga minute kua an khelh tlin rualin goalkeeper Thibaut Courtois chesualin Jofre Carreras cross ball vawrh chhuah chu an lam goal-ah a tilut palh a, Espanyol lamin hma an hruai phah lel!
Mikhual team hlimna erawh a rei ta lo a, Espanyol khan sakeibaknei muhil an chhaihkawlh lek fang a ni a! Goal an chhuah atanga minute li an khelh tlin rualin Dani Carvajal chuan Jude Bellingham siamsak atangin Real siphurh a sut er zawk a, hei hi mikhual goalkeeper Joan Garcia chhuah intanna a ni.
Second half laihawl an thleng a, minute thum lek chhungin Brazilian pahnih Rodrygo leh Vinicius Junior goal a lut zawn zaih a; hun tawp dawnah penalty atangin Mbappe goal kan hmu chhunzawm leh bawk.
A club thar tan inelna hrang hranga a game khelh hmasak vawiriat atangin Mbappe goal kan hmu ta der a; Inrinnia a spot-kick chhuih kha Carlos Romero laka Endrick hlawhchhuah penalty a ni.
Inrinni Bernabeu inkhelah mualneitu team khan first half chhung ringawt pawhin goal zawnah tum 14 zet ball an thawnlut a, a hun a la thlen loh vang nge heti zat target fuh mah se goal lawm tur nei loin chawlhlawk an hmang.
Second half-ah an hawn nawr leh tak tak a, vawi 17 tehreng goal zawnah ball thwnlut lehin, chuti zatah chuan tum li ngawt an hlawhtling ta.
League game an khelh hmasak vawiruka vawili chak chungin Italian coach ropui berte zinga mi Carlo Ancelotti team hian La Liga table-ah he thu buatsaih lai thleng hian point khata hmahruaitu Barcelona pha loin pahnihna an luah a, nizan result tarlan hman loha Catalan team-in mualneitu Villarreal an hneh leh chuan Nou Camp club hmahruaina hi a fal zui leh deuh dawn a ni.
Ancelotti team hian La Liga bika tlawm lo rei ber pahnihna ni mek an nihrual a; an aia tlawm lo rei awmchhun Barcelona chuan kum 2017 leh 2018 khan league game 43 chhung tlawm an lo pumpelh tawh a, kha kha tun thlengin record ding lai a la ni.