Champions League knockout playoff draw:
Real vs City
Nimin Nyon khawpuia Champions League knockout phase playoff-a intum tur an pawh fel takah defending champion Real Madrid leh 2023 winners Manchester City intum tur chu mite ngaihven hlawh ber ni nghalin, Europe team lian pahnih hian table-ah automatic-a last 16 stage lut thei chinho awmna top eight an thleng zo lo ve ve am Real hi 11-an niin, City phei chu 22-na daihah an thu a, league-phase format thar an duanchhuah zulzuiin playoff an khelh a ngai ta a ni.
36-team Champions League group table-a pakuana atanga 24 chinte tan two-legged playoff hmanga last 16 luh theihna kawng hawnsak an ni a, chu chu La Liga leh Premier League lama an team hraw pahnihte innghahna a ni ta mai mai rih!
2023 Champions League winners City hian Etihad Stadium-ah Madrid an mikhual phawt ang a, second leg khel turin Spain an pan zui ve leh dawn a ni.
Kum dang ang lo takin kumin draw-ah hian ram khat chhuak team-te chu intum phalsak an ni a, chuvangin nimin playoff draw-ah hian French club ve ve Paris St Germain leh Brest pawh an intum a ngai ta a, a tu emaw zawk zawkin last 16 an lut zo dawn lo.
Top eight chuangkai zo bik lo Serie A giants pahnih Juventus leh AC Milan erawh he draw-ah hian an inhamtawng lo hlauh a; Italian team hnih hian Dutch club ve ve tumin, Juve leh PSV Eindhoven, Milan leh Feyenoord kan hmu dawn a ni.
Manchester City leh European Cup-a vawi 15 tehreng champion tling tawh Real Madrid inhmachhawn dawn boruakah hian Champions League play-off round danga Celtic leh Bayern Munich insu tur pawh hi boruak neilian pakhat a ni ang.
Kum 1967-a an champion hnua British club zinga he trophy hawn thei hmasaber Celtic hian Celtic Park-a Bayern an mikhual zet hnuah Bundesliga club chuan Brendan Rodgers-a team hi Allianz Arena lamah second leg khelin an mikhual ve leh dawn a ni.
Playoff first leg hi February ni 11/12 chhunga khelh tur niin, playoff second leg hi February ni 18/19 atan dah a ni thung a; an han inchingfel ang a, February ni 21 chu last 16 draw hun a ni.
Team 36 inelna Champions League group table-ah khan English Premier League club pathum – Arsenal, Liverpool leh Aston Villa-te chuan top eight luahin play-off an khelh buai a ngai ve ta lo a; Liverpool kha league phase-ah a sang ber niin, an hnuai chiahah Barcelona an awm.
Arsenal pathumna an ni pha ve bawk a, Villa chuan last 16 lut pha chin hniam ber luahin pariatna an ni.
-- Advertisement --
Playoff draw:
Club Brugge v Atalanta
Sporting v Borussia Dortmund
Manchester City v Real Madrid
Celtic v Bayern Munich
Juventus v PSV Eindhoven
Feyenoord v AC Milan
Brest v Paris St Germain
AS Monaco v Benfica