Rebound relationship engtin nge i tih ang?

Rebound relationship engtin nge i tih ang?
Rei tak an inzui hnuah an inthen a, a nunah ruak deuh huai a awm a, chumi hnawhkhah dan chu a ngaihtuah a. Ngaihventu a mamawh a, ngaihventu a neih that tak loh avangin depression hial a neih phah ta a. Ngaihzawng tur a melh ve zuai zuai a, ngaihzawng nghet deuh hleka neih a hun ve leh tawhin a inhria a. Tichuan, an inthen atanga thla hnihna velah chuan tu emawni a date ve leh tan ta a ni.
Chutia ngaihzawng thar nei ta chu a thla khatna vel chu nuam an ti viau, mahse, chu an inlaichinna tharah chuan a rilru a pe lo tial tial tih a inhrechhuak ta. Inthen leh mai a hlau a, inkawp zui hram a duh si. A dinhmun chu ‘rebound relationship’ an tih hi a ni ta.
Eng nge rebound relationship chu? Rei tak inngaizawng tawh, inthen hnu reilotea ngaihzawng dang nei leh nghal, mahse, inngaizawng rei si lo ang chi hi ‘rebound’ an ti. Rebound relationship hi a boruak a hautak ru thei hle. A hmaa ngaihzawng te nena an inzui rei zawh poh leh a rebound boruak chu a khirh thin. Ngaihzawng/kawppui te nena inthen hian rilru leh ngaihtuahna thlengin a tibuai a, a hmaa kan inlaichinnaah khan kan hlim tak tak chuang lo a nih pawhin, inthen meuh chuan thawk khat buai deuh map chu a awm ngei thin.
Rebound relationship chu engtin nge i lo hmachhawn ang? Tun tumah hian relationship lama mithiam rebound relationship chungchanga hriattur pawimawh ni a an sawi te kan rawn tarlang e.
1. I beisei tisang lutuk lo la, i ngaihzawng thar chu a hmasa zawkin a tihsual ang kha tisual ve lo turah ngai suh. In pahnih tan hmalam hun thui tak thlir dun nghal kher a ngai lo. I ngaihzawng thar chuan ‘serious’ a duh a nih pawhin ‘aw’ ve nghal mai suh. Ngaihzawng then hlim deuh hlawl i ni a, i tan ‘serious’ nghal loh a tha zawk.
2. I ngaihzawng thar hi i rilru leh ngaihtuahna lama harsatna i tawh te pumpelh nana hman tum suh. Rebound relationship-ah chuan a tu emaw zawkin eng emaw atana hman tangkai mai mai ni a inngaihna an nei awlsam hle. I ngaihzawng then rilru lak pen nana ngaihzawng thar neih chu tihchi a ni lo, kawng dang ngaihtuah zawk rawh. I natna thawi dam nana midang hman tum chu a fuh lo.
3. Ngaihzawng/kawppui then hlim i nih avangin ngaihzawng thar i neih leh hmain thian anga kawm nel hmasak tum phawt rawh. Mi thar han tawn a, boruak thar hnuaia thil thar han zir vel te hi a nuam ve a, rilru a chhawk zangkhai ve thei. I ‘rebound’ pui tura i duh deuh chu thianah siam hmasak i tum phawt tur a ni.
4. I rebound pui tur midang daih ni thei se a tha. Nangma nuam tih zawng leh i ramri kham chin piah lam dai tura nawr kal thei che kha ‘rebound’ pui atan a tha. Nangmah ang lo tak kha ‘date’ la, i nuam tih zawng ang ti ve lo, a nuam tih zawng nuam i tih ve loh, duhzawng in ang lo tak te kha rebound puiah a tha viau. Chu chuan thil thar min tawn tir a, thil thar min zirtir a, kan la dai ngai loh kan dai phah thin a, a tihchi riau.
5. Thudik tak sawi a, engmah zêp neih a tul lo. I ngaihzawng then tak chungchang pawh a zawt che a nih chuan dik taka hrilh mai tur, mahse, i ngaihzawng hlui chu demna aw-ka emaw neih a fuh lo ang a, fak hluai pawh a fuh chuang lo. Engkimah thudik tak hrilh zel ang che.