Record siamin Billboard 200-ah Taylor Swift a No.1

On Jul 18, 2023 5 0

Record siamin Billboard 200-ah Taylor Swift a No.1
Taylor Swift album thar ‘Speak Now (Taylor’s Version)’ chu Billboard 200 (albums) chart No.1-ah a debut a, he chart-a No.1 kai thei album 12 a neihna a ni. Hetihrual hian a album dang pathum chu chart top 10-ah langin, zaithiam damlai zingah tum khata he chart-a top 10-a lang thei album pali nei thei awm chhun a la ni a, hmeichhe zaithiam zingah he chart-a No.1 kai thei album ngah ber a ni ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘Speak Now (Taylor’s Version)’ hi an tlangzarh atanga kar khat chhungin US-ah 7,19,000 an hralh hman a, chung zinga 5,07,000 chu album tak tak hralhna niin, 2,06,000 chu streaming atanga album hralhna tlukpui (on-demand official stream maktaduai 269.33) a ni a, album-a hla mal hralhna atangin 3,000 a tling thei bawk. He album hi kumina album tlangzarh tawhah chuan kar khat chhunga US-a hralh hnem theih ber a la ni bawk.
Taylor Swift album ‘Midnights,’ ‘Lover,’ leh ‘Folklore’ te chu chart top 10-ah an lang bawk a, heti hian Swift hi zaithiam damlai zingah tum khata he chart top 10-a album pali nei thei awm chhun a ni. Zaithiam dang hetiang tithei chu Prince kha niin, 2016-a a thih khan a album panga chu a rualin chart top 10-ah a lang a, Prince hi a thih hnua thil thleng a ni a, damlai ngeia hetiang tithei awm chhun chu Taylor Swift chiah a la awm.
‘Speak Now (Taylor’s Version)’ hi Swift album 2010-a a tlangzarh tawh ‘Speak Now’ a re-recorded version a ni a, a original album pawh kha Billboard 200 No.1-ah a debut tho a ni. Tuna a re-recorded version hi hla 22 a awmna niin, a original album-a hla 14 te chu record tha lehin a dah leh vek a, hei bakah a hla la tihchhuah loh te a dah belh bawk a ni. Taylor Swift hian a album dang ‘Red’ leh ‘Fearless’ te pawh a re-recorded version 2021 khan a tlangzarh tawh a, Billboard 200 chart-ah No.1 an kai ve ve bawk a ni.
Taylor Swift hian Billboard 200 chart-a No.1 kai thei album 12 a nei tling ta a, Barbara Streisand lehpelin hmeichhe zaithiam zinga he chart-a No.1 kai thei album ngah ber a ni ta. ‘Speak Now ‘Taylor’s Version)’ a tlangzarh hma hian Streisand nen No.1 kai thei album 11 ve ve an nei dun a, tunah chuan Streisand hi a kalsan ta a ni. A nawlpuiah chuan Swift hian Drake nih rualin, zaithiam zinga he chart-a No.1 kai thei album ngah lamah pathumna an ni dun a, The Beatles (19) leh Jay-Z (14) te chiah a pha lo.
Taylor Swift hian record dang pawh a la siam ta zel a, tun kum nga, 2019-2023, chhung chu kumtin album thar No.1 kai thei a la nei ziah a, 2019-ah ‘Lover’ a No.1 a, 2020-ah ‘Folklore’ leh ‘Evermore’ No.1 lehin, 2021-ah ‘Fearless (Taylor’s Version)’, 2022-ah ‘Midnights’ te No.1 lehin, tunah ‘Speak Now (Taylor’s Version)’ a No.1 leh ta a, Swift hi hmeichhe zaithiam zingah kum nga chhung, kumtin album thar No.1 kai thei nei ziah thei awm chhun a la ni. Zaithiam dang he chart-a kum nga chin kumtin album thar No.1 kai thei nei ziah thei te chu The Beatles (album pasarih, 1964-70), Drake (album panga, 2015-19), Jay-Z (album panga, 2000-04) leh Paul McCartney (album panga, 1973-77) te an ni.
Taylor Swift album te hi hralh a kal thei hle a, 2019 hnua kar khat chhunga album hralh tam zual top five zinga album pali chu Taylor Swift album an ni. Nikum-a a album ‘Midnights’ kha a tlangzarh karah maktaduai 1.578 hralhin, 2019-ah ‘Lover’ (8,67,000), 2020-ah ‘Folklore’ (8,46,000) leh tunah ‘Speak Now (Taylor’s Version)’ (7,16,000) te hi 2019 hnua kar khat chhunga US-a album hralh kal zual top 5-ah an lang a, tun kum 5 chhunga kar album hralh tam zual top 5-a lang thei zinga Swift ni lo awm chhun chu Adele ’30’ chiah kha niin, 2021-ah 8,39,000 a hralh thei a ni.
Swift hian record dang pawh a la siam! A album tlangzarh tawh zinga pakua chu kar khat chhungin US-ah maktaduai chanve tal (5,00,000) a hralh tling vek a, zaithiam dang hetiang tithei hi an la awm ve lo.
Chart No.1 hlui Morgan Wallen ‘One Thing at a Time’ chu 1,04,000 hralh lehin No.2 a la ni a, he album pawh hian record siamin, chart-a a lan chhung, kar 19 chhung chu kar tin 1,00,000 an la hralh tling ziah a, hetianga kar 19 chin kar tin 1,00,000 hralh tlin theih album dang a la awm lo.
Lil Uzi Vert ‘Pink Tape’ chu 61,000 hralh lehin No.1 atangin No.3-ah a tawlh a, Peso Pluma ‘Genesis’ chu 59,000 hralh lehin No.3 atangin No.4-ah a tawlh a, chart No.1 hlui Taylor Swift ‘Midnights’ chu 55,000 hralh lehin No.4 atangin No.5-ah a tawlh ta bawk.
Morgan Wallen album dang ‘Dangerous: The Double Album’ chu 46,000 hralh lehin No.5 atangin No.6-ah a tawlh a, chart No.1 hlui Taylor Swift ‘Lover’ chu 45,000 hralh lehin No.8 atangin No.7-ah a insawn a, chart No.1 hlui SZA ‘SOS’ chu 44,000 hralh lehin No.6 atangin No.8-ah a tawlh a, Gunna ‘A Gift & a Curse’ chu 42,000 hralh lehin No.7 atangin No.9-ah a tawlh a, chart No.1 hlui Taylor Swift ‘Folklore’ chu 33,000 hralh lehin, No.13 atangin No.10-a kai thar ve leh ta bawk.