Red Ribbon Quiz

Champhai district huam chhunga school naupang puala Red Ribbon Quiz inelna buatsaih dan tur relin nimin khan Champhai DC hovin an thukhawm a.
  HIV laka inven dan, inenkawl dan leh a hrik veite thinhrik lova tha taka enkawl dan zau zawka zirlaite hnena inhrilhhriatna kalpuina tura Quiz hi buatsaih a ni a. Ruihhlo leh mipat hmeichhiatna hmansualna laka la fihlimte an fihlim zel theihna turin Middle School, High school leh Higher Secondary School an kal lai atanga HIV chungchang zirtirna pek a pawimawh avangin MSACS bultumin he Red Ribbon Quiz hi huaihawt a ni.  
Kan hriat angin HIV/AIDS-ah India average chu  0.20% a nih laiin Mizoram chu 2.73% a ni a, India ramah kan sang ber a, national average let 13 zeta sang kan ni. Kan dawtah Nagaland (1.37%) awmin, Mizoram zatve a ni a; Manipur (0.87%) chu pathumna a ni a, Mizoram hmun thuma thena hmun khat vel an ni. North East state-te hi a tam zawk chu national average aia sang vek kan ni. 
Tunhmaa India rama a sang ber indawt ni thin Manipur leh Nagaland te chu a hniam zawngin an kal tawh a, Mizoram erawh a sang zawngin kan vung chho hlerh hlerh mai niin a lang. 
HIV/AIDS do nana hma kan lak dan hi a ropui leh lansarh ang ai hian a thawk nep thin hle tih chu a takin kan tawng chho mek a ni ber a. Kum 2010 atang khan Red Ribbon Football tournament (VC huap) kalpui a lo ni tawh a, a thawm a lian a, mipui pawhin HIV/AIDS hming kan hre bel, mahse a vei kan tlem phah em em lo va.  HIV/AIDS dona thuziak hrang hrang, sticker, bag, taxi hnung, city bus hnung, poster, banner, signboard, bazar bag, YMA thutthleng, khawi hmunah pawh hmuh tur a awm, HIV a tlakhniam phah em em lo.
Mizoram dinhmun hi a hniam ve hret hret tan tawh niin MSACS lam chuan tunhnai khan an sawi a, thil lawmawm tak a nih rualin, state dang nen khaikhin ralah chuan kan tlakhniamna hi a la ropui lo hle. NACO fund kan hmuh thin lai khan kan pung tual tual emaw tih mai tur a ni a, tunah NACO funding a han tawp a, HIV a tlahniam ta zawk hlauh em maw ni? 
Tuna RRQ buatsaih hi thil tha tak a nih rualin, Quiz buatsaih kher lo pawha zirna inah hi chuan HIV/AIDS chungchanga inzirtirna hi chu kal reng thei a nih avangin, Quiz a zawh hnuah pawh awareness campaign hi chu chhunzawm zel ni thei se a duhawm hle a ni.