Red Ribbon Quiz….

Mizoram State AIDS Control Society chuan HIV/AIDS dona peng khat atan ‘Red Ribbon Quiz Competition’ chu Mizoram chhunga school level-ah a buatsaih dawn a. Hei hi zirlaite hnena HIV laka inven dan leh inenkawl dan zau zawka inhrilhhriatna hun atan hman tangkai tum a ni.
Kum sawm chuang kalta 2010 kumtir lam khan MSACS, UNDC leh Mizoram Football Association te chuan HIV/AIDS dona peng pakhat atan Mizoram pum huapin ‘Red Ribbon Inter Village Football Tournament’ an lo huaihawt tawh bawk a. Tunah kum 13 a lo liam leh ta a, India ramah mihring tam dan atanga chhuta HIV/AIDS hluarna ber kan ni.
HIV/AIDS dona lama hmalakna hi chu a langsar thin hle a, chutih laia a hluar zawnga kan kal zel mai hi, a eng lai hi nge HIV/AIDS donaah hian hma lak dan fuh lo deuh a awm em ni tia inenfiah hi kan mamawh tawh niin a lang. Hma chu kan la ve reng bawk si a, mahse kiam lam pan lovin a hluar zawngin a la kal zel mai si a, do dan kalphung (system) hi her danglam a, ko thlak hi kan mamawh viau tawh a ni lo’m ni, a tih theih awm e.
Tuna Red Ribbon Quiz Competition buatsaih hi sikul level a nih avangin, zirlaite hnenah awareness beihpui thlak a remchang dawn hle a. Zirlaite hnenah he hri hlauhawm tak that loh dan leh hlauhawm dan hi kan fah hneh phawt chuan awmzia a nei chho ngei ang tih a rinawm a. Duhthusamah chuan kum nga chhung target a, kum tin hetiang programme hi kalpui theih ni se, chu chuan awmzia a nei nasa lehzualin a rinawm.
HIV/AIDS vei tam zawk hi chu, a hlauhawm dan hre kur chunga HIV/AIDS kaina kailawn heng drugs leh sex laka inthiarfihlim lo an ni tlangpui a. HIV/AIDS kaina tam ber sex hi rilru fim vak lo puttirtu drugs leh ruihhlo dangte a nih thin avangin, heng a kaihhnawihte pawh hi HIV/AIDS awareness huang chhungah khung tel vek a pawimawh khawp ang.