Red Sea-a tuihnuailawng pilah mi paruk thi

Red Sea-a tuihnuailawng
pilah mi paruk thi
Egypt-a Hurghada khawpui bul, Red Sea-ah khualzinte chuanna tuihnuailawng a pil a, mi paruk an thi.
Tual chhung thuneitute chuan lawng pilah hian mi 39 chu chhanchhuah an ni tih an sawi a, an ram huna Ningani chawhma dar 10:00 (India-a chhun dar 01:30) vela chhiatna hi thleng a ni.
Lawng hian tui chhunga lei rualrem lo lai a su a, a pressure a hloh ta nia ngaih a ni a, finfiahna erawh a la awm lo.
Thi zingah hian doctor nupa pawh an tel a, an fanute erawh damdawi inah an awm niin thuneituten an sawi a. Russian thuneitu pakhat chuan thi dang pahnih chu hmeichhia an ni tih a sawi niin an ram sorkar news agency Tass chuan a tar lang.
Tuna chhiatna thleng hi tun hnaia Red Sea-a khualzin phur lawngin chhiat a tawh vawi hnihna a ni ta a. November pawh khan Marsa Allam bulah lawngleng letin a chuang mi 11 chin hriat loh an ni zui a, an thi nia ngaih a ni.
Red Sea Governor Amr Hanafy chuan tuihnuailawng, ‘Sindbad’ company hian kum tam tak tui hnuaia zin hi an kalpui tawh a. Tun tuma chuangte hi Russia, India, Norway leh Sweden ram mite an ni tih a sawi a. Thawktu mi panga erawh Egyptian vek an ni.
Hanafy-a hian thite hi Russian vek an nih thu a sawi a; mahse, tute nge an nih erawh a kimchanga puan a la awm lo.
Chhiatna thleng hi chhui zui nghal mek a ni a, hetih lai hian Association of Tour Operators of Russia chuan Telegram-ah tuihnuailawng hi metre 20 vela thuka a awm laiin tui chhunga lei a su a, a pressure hlohvin a talbuai zui ta niin an tar lang.
Chetsualna thlenna hmun, Hurghada khawpui hi Cairo chhimchhaka awm niin a tuipui kam mawi tak leh tui chhunga leilung pianhmang mawi takte avangin khualzinte tlawh nasat hmun a ni.