Reds an la beidawng lo

Thawhtan zana English Premier League inkhel awmchhunah King Power Stadium-a lenglut Liverpool chuan si thum faiin hnehna an chang a, champions league khelh phak an beisei chhunzawm zel. An mualah an tlawm vangin Leicester City dinhmun a chhe leh zual a, tlakhniam an hnaih deuh deuh zel.
Panganaa awm mek Liverpool hi 19-naah awm mek Leicester City hmachhawn turin King Power Stadium-ah an leng lut a. Mimualah khel tha vut lo mahse si thum faiin an chak tho thung. Khelh thum khelh hmabak an la neihah khelh li khelh hmabak la nei Manchester United lehpelh tumin Reds hian thapui an thawh zui dawn a. Newcastle United leh Manchester United te nen top 4 huang luah phak tuma an inel a hmuhnawm chhunzawm viau tura ngaih a ni.
Table hnuai ber dawttua awm mek Leicester City hian an mualah point hmuh ngei tumin tan an khawh a, goal thun tuma an nawr luat tuar lovin goal an chhuah thung. Chawlhlawk dawn hnaihah Liverpool hian an khingpuite an nawr let thut a. Foxes defender te chetthat tawk loh hlawkpuiin goal an thun. DIng lam sira awm Mohamed Salah chuan tha zetin a chhawp a. Salah siam tha tak hi Curtis Jones chuan minute 33-naah awlsam takin a pet goal a, hmahruaina goal a thun.
Goal thun hmasa zawkah an tan vangin Jurgen Klopp-a enkawl Liverpool hi inringtawk zual zawkin an inlan a, goal pawh an thun belh leh thuai. Goal hmahruai thuntu Curtis Jones chuan free turn pui zet a neih chhawr tangkiin minute 36-naah an goal hnihna a thun a, an hmahruaina a tizau. Foxes tlarhnung tihsual vangin Liverpool hian goal thun belh theihna hun remchang an nei a, si nghak Iversen chuan tha zetin a lo dang hlauh a, chawlhlawk hmain goal dang an chhuah belh lo hlauu.
Chawlhlawk hnu lamah Liverpool an khel tha chhunzawm zel a, minute 71-naah Trent Alexander-Arnold chuan free kick an hmuh a chhawr tangkai a, pui zetin goal kilah a pet goal. Hemi tuma free kick an hmuh hian Arnold leh Salah te chu pet tur ang takin an ding dun a, Salah thai zeuh chu Arnold hian pui zetin a pet goal zui ta a ni. Goal thum an thun hnu hian goal dang thun belh theihna hun tha nei bawk mahse an chhawr tangkai zo tawh lo a. Si thum faia hnehna changin Reds chuan point thum an hmu zui ta a ni.
Leicester City laka point thum an hmuh hmangin Liverpool hian an chung chiaha awm Manchester United nen an hnaih leh zual a. An hmelma lian ber United nen hian an inkarah point khat chauh a tla zep mek a, Reds hian Red Devils aiin vawikhatin an khel tam zawk thung.
Liverpool in top 4 huang luah phak beiseina sang zawk nei a, an phur em em laiin an muala tlawm Leicester City erawh chu an dinhmun a chhiat belh leh zual vangin an hnual ve viau thung. Foxes hian khelh 36 atanga point 30 hmuin 19-naah an awm mek a. EPL ah cham chhunzawm turin khelh hmabak pathum an la neihah chet that zawn an mamawh hle.