Rel kawng compensation beiseitu zinga pawmsak loh ten an la hre lo

Sairang thlenga rel lut tura ram laksak nia insawi zingah compensation la dawng lo an awm a, heng zinga ram pass 12 chu a endiktu lamin pawmsak harsa an ti a, pawmsak an nih leh nih loh hriattir an la ni lo nia sawi a ni. Bairabi to Sairang rel kawng atan hian Aizawl district-ah Sairang leh Sihhmui ram a paltlang a. Northeast Frontier Railways (NFR) chuan Aizawl to Bairabi rel kawng atan cheng vaibelchhe 340 a ruahman a, Aizawl district-ah hian compensation atana sum pek zat chu vbch. 523 chuang a ni. Compensation pekna atan hian award pahnih – Award No.5 of 2012 leh Award No. 3 of 2019 siam niin mimal ram 128 leh 72 ve ve lak a ni.
Aizawl district bawrhsap thuchhuak chuan, Railways compensation pek zawh hnu hian ram neitu engemawzatin rel kawngin an ram an paltlang thu leh zangnadawmna pek an nih loh thu a hnenah an thlen tih a sawi a. A then phei chu arbitrator leh court-ah kalin, heng thubuai chingfel tur hian bawrhsap pisa atanga team insiamin, kum 2022 leh 2024 ah survey neih leh a ni a; railway compensation pe turin NFR-ah award thawn a ni tih a sawi.
He award siam belhah hian vawiin thlengin NFR hian sanction a la siam loa, theih ang tawkin bawrhsap atang chuan nawr reng a ni thin tih a sawi bawk.
Tunhnaiah kil hrang hrang atanga compensation thubuai chingfel tura nawrna an hmuh avangin NFR deputy chief engineer (Civil) chuan district administration tanpuina a dil angin, kumin July 30 khan bawrhsap leh NFR hotuten an sawiho a. Joint survey neih a rel a, survey neih hma hian record leh tul inhaithat leh a ni tih sawiin, ‘Tun hnua hriatchhuah ni ta chu, marked land acquisition plan hi Aizawl district bawrhsap pisa kangah khan a kang tel ve a, district administration hian Railway survey record rin mumal tur a neilo,’ a ti.
Kumin August 19 atanga September 1 thleng bawrhsap, NF Railway leh surveyor-ten mi 14 ram endik hna an thawk a, chu’ng zingah chuan ram 7 chu rel kawng ‘right of way’ ah an ram a lut ngei tih hmuhchhuah a nih laiin, ram pass 12 dang chu endik a nih hnu in, thutlinga pawm a ni lo tih bawrhsap hian a sawi.
Survey team-ah hian bawrhsap pisa atangin senior officer leh surveyor an kal bakah Railways aiawh an kal a, an thil hmuh chhuah hi sawrkar rawn chungin hma lak chhunzawm tum a ni tih a sawi a ni.
The Aizawl Post-in compensation la pek loh ho a zawhnaah, compensation dawng tura pawm zingah an tel leh tel loh hi tawngka emaw lehkha in emaw an la hre loa, an kal zel dan tur pawh an la sawi thei lo tih an sawi.