Rel tlan hun sawn dilna pawm Thlai thawn tur dahna siam tum

Sairang – Guwahati/ Kolkata-a rel thlen hun sawn tura chief minister Lalduhoma dilna chu Railway minster Ashwini Vaishnaw chuan a lo pawmsak a. Thlai thar thawnchhuah tur dah lailawkna siam rawtna pawh pawmin, a hmunhma lo ngaihtuah turin a chah.
Delhi-a cham mek chief minister hian Thawhtanni khan Union Railway minister a hmu a. Sairang to Guwahati rel kal hun chu passenger-te awlsam zawkna turin zing dar 4.30 a Guwahati thleng hman tura a hun siamrem sak tura a rawtna chu a pawmsak a. Kolkata to Sairang rel, Sairang Station-a zan dar 7.45 a thleng thin chu khualzinte tana awlsam zawk turin chawhnu dar 3.00 a thleng tura siamrem rawtna chu a lo pawm bawk.
Sairang to Delhi Rajdhani Express tlan chu Delhi thleng turin darkar 42 leh minute 20 a mamawh a, kawng tawi zawk zawh tir turin chief minister hian rawtna a thlen a. Hei hi pawmsakin, kawng tawi leh rang zawk zawhtir a nih tur thu a lo hrilh a, kawng tharah hi chuan darkar 4 velin rel hi a thleng hma dawn tih sawi a ni.
Sairang to Delhi Rajdhani Express hi khualzin an tam avangin kar khata vawi hnih tal tlantir tura a ngenna pawh pawmin, bawhzui nghal a nih tur thu a hrilh.
Adviser to chief minister hnen atanga Sairang rel station ramchhunga thlai thar thawnchhuah tur dah lailawkna – warehouse /cold storage din nise tia rawtna chu Railway minister hian an lo bawhzui tur thu a sawi a. Mizoram sawrkar chu warehouse dinna tur hmun remchang ngaihtuah tura chahin, thil tul dang chu Railway ministry-in a ngaihtuah zui thei dawn tih a lo hrilh a ni.
Chief minister hi adviser to chief minister Dr KC Lalmalsawmzauva leh OSD to chief minister R Lalrodingi ten a tawiawm.
Union Railway minister hnena CM thu thlen dang:
8 Tha taka ILP kenkawh a nih theihnan leh hnam dang khualzinte awlsam zawkna atan Mizoram ILP portal chu IRCTC train ticket portal-a dahluh ve nise tia a rawtna chu IRCTC hotute a lo zirchian tir tur thu a hrilh.
8 Thenzawl Peace City Master Plan siam mek a nih avangin Sairang to Thenzawl Railway alignment peihfel thuai a tul tih a hrilh chu February 2026 ralhmaa peihfel an lo tum tur thu a sawi.
8 Chief minister-in Silchar to Bairabi khualzin phur rel, Sairang thlenga extend tur chu tlan tir (flag off) thuai turin a ngen a. Railway minister hi a hmun ngei atanga flag off turin a sawm nghal. Hun remchang a lo zawn tur thu a lo hrilh a ni.