Sawrkarin district-a thuneihna tam zawk pek tumin hma a la: – DP&AR minister

District bawrhsap pisa chu mini-secretariat anga hna thawk (function) turin kalpui tum a ni a, sawrkarin hma a la mek tih Department of Personnel & Administrative Reforms minister K Sapdanga chuan a sawi. Thawhtannia Mizoram Civil Service Association (MCSA) conference vawi 49-na Aizawla neih a hmanpuinaah DP&AR minister chuan, district administration hnena thuneihna tam zawk pek hi thutlukna siamah chak zawk leh mipui hnena service tha zawk leh sam khai
zawk a awm theihnan sawrkarin a duh a. Thil engemaw tih dawn hlek a, thingtlang kilkhawr zawk atanga Aizawl pan ngai kher loin, district headquarters-a tih fel mai theih turin thuneihna semzai a ngai tih a sawi a ni.
“Decentralization of power tih dawn hian, sawrkar hnathawk thenkhat zingah pawh ui tlat, phal tlat lo, harsatna hlir ngaihtuah a awm theih a, chu’ng pawh chu ram tana tha tur a nih chuan kan pal luih deuh a ngai ang,” a ti.
Transfer and posting chungchangah ‘role-based’, ‘competency-based’, ‘right man at the right post’ in sawrkarin kal a tum a. Tangkaina ber hmun apiangah a theih ang anga indah an tum dawn tih minister hian a sawi.
“Hna dilnaa pakhatna hi posting-ah duh thlantir kan ching a, norms angin kan lo nei rei tawh hle a, hei hi tihbo tum a ni. Junior grade leh senior grade-ah a tam thei ang bera remote area field-a awm dan tur ngaihtuah a tha in a lang a. Aizawl comfort zone atanga chhuak ngamte hi officer tha an ni thin tih finfiah a ni tawh. ‘Aizawlcentric thinking’ pawh hi sut keh a ngai a. Field experience nei lo, mipui mar la dek ngai lo officer Secretariat-ah kan tam lutuk hian sawrkar leh mipui inkarah kak a siam thin,” a ti.
Mizoram sawrkar flagship programme – Bana Kaih Scheme leh central flagship programme a taka tihhlawhtlin chu district-ah a innghah avangin, sawrkar flagship scheme kalpui danah, dan leh thupek kenkawhnaah, revenue administration tihchangtlun zelnaah theihtawp chhuah turin K Sapdanga hian a chah bawk.
MCSA conference-ah hian sawrkarin hma a lak mek, administrative reforms – ‘Institutionalization of District Administration as an integrated Mini-Secretariat’ leh ‘Ongoing Reforms and Progressive Decentralization of Land Revenue Administration’ zirho a ni.