Relief camp atangin Meitei haw, silai puak vangin kir leh

Relief camp atangin Meitei haw, silai puak vangin kir leh
Chi leh chi inkara buaina chhuak avanga tlanchhiaa Manipur phaizawla relief camp-a kum hnih chuang cheng tawhte chu Thawhtanni khan Bishnupur district-a tlang bulthuta an inah an haw leh a; mahse, silai puak leh avangin tam tak an let leh.
District thuneituten hawpuiin an in chhe tawh tak an thlen pui a, an in rawih tawh tak takte hi May, 2023 hnua an vawi khat tlawh lehna a ni hlawm.
Thawhlehni zan khan tlang atangin silai ri an hre zui leh nghal a, an khaw chhuahsan an awm leh nual.
Border Security Force (BSF)-ten zan dar 08:30 vela silai puak hi minute rei vak lo chhung an kap let ve a, tumah inhliam an awm hriat a ni lo.
Silai hmet puaktua inchhal tumah an awm lo va, haw lehte hi Meitei an ni a, Kuki-ten tihthaih nan an kap niin an puh a. Nilaini tukah khan an in hnaihah silai mu ruak leh tualchher mortar, pumpi an tih an chhar nual niin an insawi bawk.
Manipur Police chuan Nilaini tlai khan he thil thlengah hian FIR an ziak lut tawh bawk.
Bishnupur-a raltlante haw lehna khua hi Churachandpur district nena an inrina, Kuki tamna a ni a. Kum 2023-a an intihbuainaah pawh khan buaina chhuah nasatna hmun a ni.
Silai a puak leh hi President Droupadi Murmu-in kartawp liam taa Manipur a tlawh hnu lawkah a ni a, president hian ‘tlangram leh phaizawl chu intikim tawntu’ tia sawiin mi chengte chu inngeiha awm turin a ngen.
Meitei leh Kuki mipui pawlte chuan buaina chawk chhuaktu zawkah an la inpuh reng a. Kuki Zo Council (KZC) chuan khawi hnam zawk ve ve pawh an ina an haw leh hmain inawpna hran neih an duh chu siam a tul tih an sawi.
Meitei Alliance, Meitei Heritage Society leh Meitei pawl lian khaikhawmtu, COCOMI chuan khua leh tuiten dan anga dikna chanvo an neih chu central force hmuh leh President’s Rule-a an awm lai ngeiin bawhchhiatsak niin an insawi ve bawk.
Tar lan tawh thin angin Meitei-Kuki hnam inkara buaina hi ram inchuhna leh politic-a aiawh neih dan thil vanga chhuak a ni a, mi 260 chuang thi awm tawhin mi 50,000 dawn an in leh lo chhuahsana tlanchhia an awm phah bawk.
Tlangram district-a MLA 10, mipui aiawh pawl leh sorkar nena inkahhai puangtu hel pawl 24 chuan Manipur chu thena hnam hnihte hi inrelbawlna hrana awmtir an duh.
Hnam hnihte inkarah hian tharum thawhna thleng tawh lo mah se Kuki pawlte chuan phaizawla kir leh an ngam tawh rih lo va, hei vang hian Kuki tamna rama cheng Meitei tlanchhia te pawh tlangrama an hawtir leh an phal bik lo.
Meitei pawlte chuan tlanchhiate chu an inah haw leh vek se, inbiak theih a ni dawn nia an sawi laiin Kuki hruaitute chuan eng hmalakna mah a awm hmain inrelbawlna hran siam phawt a, chumi hnuah relief camp-a la awm mi sang telte haw dan sawiho leh a tul niin an sawi ve thung.