Relief Camp sakna pe tla Hlimen huamchhunga leimin avanga an chenna luahzui thei lo leh chen zel hlauhawm avanga insuanchhuakte tana Relief Camp siam chu sak zawh a nih hnu ah Zirtawpni khan hawn a ni a. He camp sakna senso pawh sawrkarin a pe tla vek tawh a ni.

Hlimen Relief Camp Committee buatsaihin Relief Camp hi hawn a ni a. Disaster Management & Rehabilitation minister K Sapdanga chuan chhungkaw 41 chenna tur thla khat chhunga sak zawh a ni ta chu lawmawm a tih thu sawiin, Relief Committee chungah leh he camp sakna atana tha leh sum leh pai thawhtu zawng zawng chungah an lawm tih a sawi.
“Camp sak a nih hian theih ang angin sawrkarin hma a la a, bialtu MLA pawhin theihtawp a chhuah niin ka hria a; sawrkar anga kan tih theih tawk a tlem hle a, kan tih theih ang ang kan tih ve chhunah ngaidam chunga min thawhpui hi kan lawm takzet a ni. He camp hlawhtlin theihna tura min nawrtu zawng zawng chungah pawh lawmthu ka sawi a ni,” a ti. Relief Camp sakna senso cheng nuai 10 chuang a hlan nghal a, a sakna atana bill thehluh zawng zawng pek fai vek a ni.
Aizawl South-III bialtu MLA Baryl Vanneihsangi Tlau chuan, helai hmun hi 2025 February thleng chauh an awm theih dawn avangin mahni in leh loa in chen leh theihna turin theihtawp an chhuah chhunzawm dawn tih a sawi a ni.