Rema & Selena Gomez ‘Calm Down’-in record siamin Spotify-ah 1B stream a kai

Rema & Selena Gomez ‘Calm Down’-in record siamin Spotify-ah 1B stream a kai
Nigerian Rema leh Selena Gomez te zai dunna, an hla hit ‘Calm Down’ chuan Spotify-ah vawi tluklehdingawn stream a hlawh tawh a, African artist led-artist nihna hlaa Spotify-a vawi tluklehdingawn stream hlawh thei hmasa ber a ni. He hla avang hian nimin lawka an sem tak 2023 MTV VMA-ah pawh Best Afrobeats Song Award an dawng nghe nghe a ni.
Rema tan he hla hi a hlu hle a, rimawi khawvelin a hmelhriat tan tak takna a nih bakah African zaithiam zinga lead artist anga he streaming platform-a vawi tluklehdingawn stream kai thei hla nei thei hmasa ber a ni a, Afrobeat hlaah vawi tluklehdingawn stream kai thei hmasa ber a ni bawk.
Rema chuan, “Malsawmna a ni. Keima tana hlawhtlinna bik a ni lo va, ka team leh chhungkua mai bakah culture tana thil ropui a ni,” a ti a, Selena Gomez pawhin Instagram Stories leh X (Twitter ni thin kha)-ah ‘Calm Down’ hlawhtlinna hi post-in, “Ka va lawm em. @heisrema ka duh tawp che!” a ti ve bawk.
Billboard chart lamah pawh ‘Calm Down’ hi a che tha viau a, Hot 100 (singles) chart-ah No.3 kaiin, Rema tan he chart top 10-a a lan vawi khatna a ni a, Gomez tan a vawi kuana a ni ve thung. Adult Pop Airplay chart-ah No.1 kaiin, Radio Songs chart leh Pop Airplay chart-ah te pawh No.1 a kai tei a ni.
Nigerian singer Rema hian ‘Calm Down’ original version hi February 2022 khan a tlangzarh a, a solo album hmasa ber ‘Rave & Roses’ atanga a single niin, Selena Gomez nena remix hi nikum August khan tichhuakin a video pawh nikum September khan an tichhuak nghal a, kum hnih a tlin hmain Spotify-ah vawi tluklehdingawn stream a kai hman ta a ni.