Remna kaihhnawihah Duhoma’n dawt bakah dawt lehzual a sawi – MNF

India sawrkar leh MNF inremna kaihhnawihah chief minister Lalduhoma chuan thudik lo ni si, awihawm deuh deuh tam tak a sawi tih MNF party chuan an sawi.
MNF Media & Publicity hruaitute chuan, kumina MZP-in Remna Ni lawmna a siamah chief minister Pu Lalduhoma hian, India sawrkar ruahmanna in 1975 August 15 khan Pu Laldenga te chu Pakistan atangin ruk chhuah an ni a, Geneva-ah an kal, tia a sawi thu sawi chhawngin, Pu Laldenga staff-te leh India sawrkar aiawhte hi foreign-ah vawi tam a hma hian an inbe tawh a, chumi kalzelah chuan India sawrkarin Pu Laldenga ngei hi biak an duh avangin Pu Laldenga, Pi Lalbiakdiki leh Pu Zoramthanga te chuan Karachi atangin Beirut – Istanbul kaltlangin Geneva an thleng a, India sawrkar nen an inbia a. Rukchhuah an ni lo tih an sawi.
Hemi zulzui hian, India sawrkar leh MNF ten remna thuthlung hmasa zawk chu 1976 July 1-ah Shillong-ah an ziak a. Hei hi ‘Shillong Accord’ kan tih thin kha niin, hetihlai hian chief minister Pu Ch. Chhunga nen Shillong-ah an awm ve reng, tiin Pu Lalduhoma hian a sawi thu an sawi bawk.
“MNF leh India sawrkar hian englai mahin Shillong Accord hi Shillongah an sign lo. Naga ho erawh chuan Shillong Accord, awmze nei zui ta lo kha vawi khat chu an sign MNF Media general secretary VL Krosshnehzova chuan a ti. Pu Ch Chhunga nen Shillonga awm ve reng anga a insawi phei chu dawt chiang lehzual a ni, tiin, “1976 July 1-ah India sawrkar leh MNF hian inbiak chhunzawm zelna atan tih tur tul sawiin Delhi-ah joint press statement an siam a. Engtik lai mahin India sawrkar leh MNF hian Shillong-ah inremna an siam lo. Chutianga thil awm hauh loa awm ve reng anga a insawi hi chu dawt chiang tak a ni tih mitinin hre vek ang u,” a ti.
Remna thuthlung ziah leh India leh MNF-in remna kawng an zawh lai chanchinah Pu Lalduhoma hian thu leh hla engemawzat a puangzar tawh a. A pawl awmna a sawn apiangin a thusawi a dang zel tih theih deuhthawin thu a ngah tih VL Korsshnehziva hian sawiin, a eng ber nge rin tur hriat har tak tak an ni hlawm tih a sawi.
Heng bakah hian finfiah leh mai harsa chi ah, ngun zawka han chhuia dawt ni si chu awihawm deuh deuhin Pu Lalduhoma hian a sawi fo thin tih pawh sawiin, “Tunhma lama a sawi kha chu mi pakhat thusawiah a ngaih mai theih laiin, tunah chuan Mizoram sawrkar lu berah a thu tawh a. Thudik lo sawi hi a rem tawh loah kan ngai. A bikin Remna Ni lawmnaa zirlai tam tak, rilru thianghlim hmaa dawt a sawi mai khan, a sawi awihtuten, thil diklo kha thudik emaw tia an hriatreng tawh tur a nih avangin thudik tarlan a tul a ni,” a ti.