Remna leh muanna atan kein Churachandpur

Mi thenkhat chu Aizawl atangin Churachandpur hi motor-in an kal peih lo ang, thlawhna lo chuan tum enah pawh an en lo ang. Pu Biaka erawh kein a kal thleng leh zak!
Patling, kum 65 mi a ni a, kum 64 a nih laiin Mizorama district hmunpui zawng zawng hi kein a lo tlawh chhuak tawh. Kea kal, hriselna aupui nana a tih a ni. Kum 63 a nih laiin Myanmar-ah remna leh muanna a awm theih nan Aizawl atangin Zokhawthar thleng kein a lo kal tawh bawk. Tunah pawh, kein a kal leh hrep a, Manipur-ah remna leh muanna a awm theih nan Aizawl atangin Churachandpur thleng a kal.
Lalbiakthanga a ni a, Sailulak khawchhuak, tuna Lawipu venga awm a ni. May ni 10 khan Aizawl a chhuansan a, May ni 19 tlai dar 4 velah Churachandpur a thleng.
“Ka chau ve tho mai. Chawn te hi a rawl a,” a ti a, kawngah a pum a dik loh avangin tum dang aiin a chau deuh niin a hria. Mahse damdawi a ei miah lo.
“Ka kal chhan hi, Manipur-ah remna leh muanna a thlen theih nan tih a ni. Ka inngaihtuah nasa, an buai tirhah khan ka buai ve nghal. A hrehawm dan tur ka ngaihtuah a, ka rilru an tihrehawm em em mai a, ka tih ve theih tawk tiin, tiang hian ka kal ta a ni,” tiin ke-a a kal chhan a sawi.
“Ka huphurh khawp mai a, kea hetianga thui han kal hi ka huphurh a, mahse ka rilruah a thawk tlat si,” a ti.
Huphurh tak chungin a chhuak a ni mai lo a, a thawhchhuah hnu-ah pawh a inchhir. Inchhir tak chungin a tum a hlen.
“Ka chhuah ni-ah ka inchhir nghal; ‘Ka lo tum ta a ni aw…’ ka ti a, mahse ka tum a ngai si. A tawp thlengin ka inchhir. Putar kum 65 lai, naupang fit zawkte pawhin an tih loh laia ka’n thawkchhuak hi a zah pawh ka zak. A hahthlak si a, ka inchhir hial alawm,” a ti.
“Tuivawl lui ka thlen te khan, police-te khan ‘E, ka pu, kal lo mai rawh, a him lo e,’ lo ti se, min lo dang se ka tih tehreng nen, min lo dang si lo a,” a ti a, a pum a nawm loh avangin a inchhir zual tih a sawi bawk.
A ralti ang em tih a ngaihtuah a, a ralti reng bawk. Zo hnahthlak khuaah pawh amah an hmuhin tlawmngaia duty te’n CID lam a nih te an lo ring a, a thla te laa kawl kher te an tum. A chhuah dawnin CID lamin a raltit avang hian kal lo mai turin an lo ti bawk nen, chung te chuan a rilru a tinuam lo a, a inchhir tizualtu a ni.
Chau chung chunga a kal thleng hi, “Miin min tawngtaipui nasa a, remna leh muanna a awm theih nan mi an tawngtai a, chuta an tawngtaiah chuan a belhchhahtuah ka tang vein ka hria,” a ti.
‘Peace for Manipur’ tih inbelna ip (bag) a ak a, a chhungah chuan chemte, tui leh biscuit a ak. ‘Peace for Manipur’ tih inziahna flag a keng bawk.
“Min phurpui leh phurpui lo an awm. Min phurpuitute’n min phurpui em em laiin tul ti lo an awm bawk a,” a ti a, kawngah pawh rin loh deuh deuhvin thlen in a hmu nawlh nawlh tih a sawi.
Chau mah se a kal zel a, inchhir chungin Churachandpur a thleng. A thiltih hian kori a tu lo ang tih te a hlau a, mahse a rilru-ah a thawk tlat si. Churachandpur-ah mipuiin an lo ngaihlu a, Singzawlah phei chuan YMA-in an lo hmuak hial.
A tum dan tak chuan, Imphal kal thlen a tum a, mahse Churachandpur-ah hian Imphal chu him lova an hriat avangin, tawp mai turin an lo ngen.